УИХ-ын байнгын хороодын дарга нарыг жилийн хугацаатай томилдог. Ийнхүү байнгын хорооны дарга нарыг он солигдохтой уралдан солихоор болоод байгаа юм. Ардын нам, Ардчилсан намынхан долоон байнгын хороогоо хуваан авч дарга нараа томилдог уламжлалтай. Ардчилсан намынханд Байгаль орчин, хүнс, хөдөө аж ахуйн байнгын хороо, Эдийн засгийн байнгын хороо, Аюулгүй байдал, гадаад бодлогын байнгын хороо хамаардаг. Байнгын хорооны даргын суудалд хэн өрсөлдөх тухай яриа намын бүлгийнхний гол сэдэв болжээ. Аюулгүй байдал, гадаад бодлогын байнгын хорооны даргад УИХ-ын гишүүн Я.Батсуурь, Д.Ганхуяг, Д.Одхүү нар азаа үзэхээр шийджээ. УИХ-ын гишүүн Я.Батсуурийн тухайд дипломатч мэргэжилтэй. Тиймээс түүнийг сонгогдох магадлалтай хэмээн намын нөхөд нь ярьж байна. Харин Б.Батбаярын оронд буюу Байгаль орчин, хүнс, хөдөө аж ахуйн байнгын хорооны даргын марафонд УИХ-ын гишүүн П.Алтангэрэл, Г.Баярсайхан, Э.Бат-Үүл нар байгаа аж. Э.Бат-Үүл гишүүний тухайд энэ салбар түүний мэргэжлээс хөндий тул хийж чадах эсэх нь эргэлзээтэй хэмээн үзэх нэгэн ч бий. Харин гишүүн П.Алтангэрэл УИХ дахь “Ногоон” бүлгийн гишүүн хүнс, хөдөө аж ахуйн чиглэлээр олон төсөл, хөтөлбөр боловсруулж баталсан нэгэн. Тиймээс түүнд даргын албан тушаал тун ч ойрхон байгаа бололтой. Ардчилсан намынхны мэдэлд байдаг дараагийн байнгын хороо бол Эдийн засгийн байнгын хороо. Тус байнгын хороонд УИХ-ын гишүүн, тус байнгын хорооны дарга Ц.Баярсайхан, гишүүн Р.Амаржаргал, Н.Батбаяр нар өрсөлдөж буй. Шинээр өрсөлдөж байгаа Р.Амаржаргал гишүүн УИХ-д сонгогдсон цагаасаа л эдийн засаг ярьж, маргалдаж, мэтгэлцдэг гишүүдийн тоонд зүй ёсоор орсон. Тэгэхээр түүнд сонгогдох шаанс бий. Гэхдээ түүнээс дутахааргүй үг “чулууддаг” гишүүн бол Н.Батбаяр. Харин даргаар түүнийг сонгоно гэдэг бүрхэг хэмээн намын зарим нөхөд нь хэлж буй.

Ардын намд дөрвөн байнгын хороо харьяалагддаг. Үүнд Төрийн байгуулалтын байнгын хороо, Төсвийн байнгын хороо, Хууль зүйн байнгын хороо, Нийгмийн бодлого, боловсрол, соёл, шинжлэх ухааны байнгын хороо. Энэ долоо хоногт багтаж байнгын хороодын даргыг сонгоно. Мөн байнгын хорооны дарга нарыг улираан сонгохгүй гэсэн яриа байгаа аж. Тэгэхээр даргын албанд өрсөлдөх гэж байгаа гишүүдэд сайхан боломж нээгдэж байгаа юм. Гэхдээ Хууль зүйн байнгын хорооны дарга Б.Бат-Эрдэнэ, Төсвийн байнгын хорооны дарга Ц.Даваасүрэн нар ямартай ч нэрээ дэвшүүлж байгаа гэсэн. Хууль зүйн байнгын хорооны даргад УИХ-ын гишүүн Ж.Сүхбаатар, Ц.Мөнх-Оргил, Д.Одбаяр нарын нэрс сонсогдож байгаа. Ж.Сүхбаатар гишүүн хуулийн асуудлаар сайд Ц.Нямдоржтой мэтгэлцдэг, СЕХ-ны нарийн бичгийн дарга, ЗГХЭГ-ын тэргүүн дэд даргаар цөөнгүй жил ажилласан нь түүний давуу тал гэнэ. Мөн УИХ-ын гишүүн Ж.Сүхбаатар Төрийн байгуулалтын байнгын хорооны даргын томилгоонд бас өрсөлдөх нь. Түүнээс гадна УИХ-ын гишүүн Ж.Батсуурь, Д.Загджав нар бий. Төсвийн байнгын хорооны даргад УИХ-ын гишүүн Д.Балдан-Очир, Д.Хаянхярваа нар өрсөлдөхөөр нэрсээ өгчээ. Харин УИХ-ын гишүүн Д.Очирбат, А.Тлейхан нар Нийгмийн бодлого, боловсрол, соёл, шинжлэх ухааны байнгын хорооны даргад зүтгэж байгаа аж. Тухайн байнгын хорооны дарга нь салбарынхаа мэргэжлийн хүн байх ёстой хэмээн зарим гишүүн үздэг. А.Тлейхан гишүүн эрчим хүчний салбарын хүн. Харин УИХ-ын гишүүн Д.Очирбат эмч учир даргын суудалд сонгогдох магадлал өндөр байгаа сурагтай. Гишүүдийн байнгын хорооны даргад өрсөлдөж байгаа гол шалтгаан нь ирэх сонгууль. Түүнээс бус байнгын хорооны дарга цалин, хангамжаараа жирийн гишүүдээс гойд илүү эрх мэдэл эдлэхгүй юм байна. Байнгын хорооны дарга хорооныхоо өдөр тутмын ажлыг удирдаж, хуралдааныг даргалах үүрэгтэй. Гишүүд үүргээ ухамсарлахаас илүүтэйгээр карьераа өсгөх боломжоо хайж буй бололтой.