Улирлын томуугийн дэгдэлт ойрын өдрүүдэд ихээр нэмэгдэж байгаатай холбогдуулан Нийслэлийн Эрүүл мэндийн газраас өрхийн эмнэлэгийн цагийн хуваарь болон НЭМГ-ын даргын тушаалын хэрэгжилтэнд хяналт тавьжээ. Уг шалгалтаар өрхийн эмнэлэгүүд цагийн хуваарийн дагуу ажиллаж байгаа боловч гэрийн эргэлт харьцангуй цөөн хийсэн байна. Учир нь амбулаторийн үзлэг ихтэйгээс эргэлт хийх цаг зав муутай байгаа ба ихэнхи өрхийн эмнэлэг унаа тэрэггүйгээс эргэлтээр явахад хүндрэлтэй байсан аж. Зарим өрхийн эмнэлэг унаатай боловч өдөр тутмын бензины мөнгө хүрэлцэхгүйгээс асуудалд ордог байна. Мөн өрхийн эмч бага нярай хүүхэд болон жирэмсэн эмэгтэй, өндөр настанг эргэхээр очиход иргэд хаалга тайлж өгөхгүй, эсвэл хаягндаа байхгүй, эсвэл үзүүлэх шаардлагагүй гээд үзүүлэхгүй байх тохиолдол байдаг гэнэ.
Иймд Нийслэлийн эрүүл мэндийн газраас иргэдэд хандан сэрэмжлүүлэг гаргажээ. Хэрэв иргэн та ханиад томуутай бол нярай бага насны хүүхэдтэй айлаар орохгүй байх, гадуур явахдаа амны хаалт маск хэрэглэх, ханиаж найтаахдаа ам хамраа таглах, нус цэрээ гудамж талбайд ил задгай хаяхгүй байх зэрэг хувийн соёлоо дээшлүүлж өөрийгөө хамгаалан өрөөлд халдаахгүй байх зарчим баримталахыг уриалж байна.
Хэрэв ханиад шуухинаа хүрсэн тохиолдолд эмчид заавал үзүүлж эмчийн зааврын дагуу эмчилгээ заалгаж эмчлүүлнэ үү. Мөн жирэмсэн эмэгтэйчүүд ханиадаар хүндэрч амьсгалын дутагдалд орох, ларингит болох /гуурсан хоолойн үрэвсэл/ зэргээр хүндэрч байгаа юм. Иймд нийт ард иргэдэд анхааруулахад бага насны хүүхэд, жирэмсэн эмэгтэйчүүд, уушигны архаг өвчтэй болон дархлааны дутмагшилийн эмгэгтэй хүмүүст анхаарал халамж тавьж даарч хөрөх, дархлаа сулрахаас сэргийлэхийг анхааруулж байна.
П.Наран