Монгол Улсад тохиолдоод буй зудад өртсөн 507.000 гаруй иргэнд хүмүүнлэгийн яаралтай тусламж үзүүлэх, зудын хохирлыг бууруулахад зориулж НҮБ-ын Онцгой байдлын тусламжийн төв сангаас дараах мөнгийг НҮБ-ын холбогдох хөтөлбөр, санд шилжүүлсэн байна. Үүнд:

1. НҮБ-ын Хөгжлийн хөтөлбөрт- үхсэн малын сэг зэмийг зайлуулах, мал сүргийнхээ талаас илүү хувийг алдсан малчдад тусламж үзүүлэх зорилгоор 1.5 сая ам.доллар.

2. НҮБ-ын Хүүхдийн санд- зудын гамшигт өртөгсдөд хүнс тэжээл, эм бэлдмэл олгох, хүүхэд, жирэмсэн эхчүүдэд нэн шаардлагатай тусламж олгох зорилгоор 963.000 ам.доллар.

3. НҮБ-ын Хүнс, хөдөө аж ахуйн байгууллагад- Хүнсний хангамж, тэжээлийн доройтлоос сэргийлэх зорилгоор 600. 000 ам.доллар.

4. Дэлхийн эрүүл мэндийн байгууллагад нэн шаардлагатай эм, бэлдмэл, зудад өртөгсөдтэй харилцаа холбоо тогтоох, сэтгэл санааны дэмжлэг үзүүлэх зорилгоор 226.000 орчим ам.доллар.

5. НҮБ-ын Хүн амын санд- Нөхөн үржихүй, эмзэг бүлгийн охид, эмэгтэйчүүдэд тусламж үзүүлэхэд 242.000 гаруй ам.долларыг Монгол Улс дахь НҮБ-ын системийн таван байгууллагад тодруулбал, нийт 3.7 сая ам.долларыг шилжүүлсэн юм байна.

Дашрамд сануулахад, НҮБ-ын Онцгой байдлын тусламжийн төв сангаас байгалийн гамшиг, зэвсэгт мөргөлдөөнд өртөгсдөд хүмүүнлэгийн яаралтай тусламж үзүүлэх, гамшгийн хохирлыг бууруулах, эрсдлээс хамгаалах зорилгоор 2005 онд НҮБ-ын Ерөнхий Ассамблейгаас байгуулжээ.

Г.Дарь