Марафон гүйлтийн энэ улирлын хамгийн сүүлийн тэмцээн өчигдөр Японы Ямагүчи мужийн Хофү хотноо болж өнгөрлөө. Жил бүр уламжлал болгон зохион байгуулдаг Хофү Ёмиүри 41 дэх удаагийн марафонд урилгаар оролцсон Монголын хөнгөн атлетикийн Үндэсний шигшээ багийн тамирчин Б.Сэр-Од хоёр цаг, 14 минут, 49 секундын амжилтаар тэргүүн байр эзэлж, эх орныхоо алтан соёмбот төрийн далбааг Наран улсын тэнгэрт мандуулсан байна. Өнгөрсөн есдүгээр сард болсон Берлиний марафонд топ 10-т багтсан Б.Сэр-Од өмнө нь хоёр удаа Хофүгийн марафонд оролцож байсан бөгөөд 2008 онд шагналт зургадугаар байрт шалгарч байсан юм.

Энэ удаагийн Хофү Ёмиүри марафонд 1299 тамирчин оролцсон бөгөөд манай тамирчны араас хоёрдугаар байрт Японы марафонч Таига Ито шалгарсан бол удаахь байрт мөн Япон улсын тамирчин Хироюүки Камигүчи бариалжээ.

С.Цэлмэг