Манай улсын нэн ядуу, орон гэргүй 130 гаруй мянган иргэн эрүүл мэндийн тусламж үйлчилгээний эрхийн бичгийн хөтөлбөрт хамрагдахаар боллоо. Азийн хөгжлийн банк, Япон улсын ядуурлыг бууруулах сангийн дэмжлэгтэйгээр Эрүүл мэндийн яам, Нийгмийн даатгалын ерөнхий газартай хамтран хэрэгжүүлэх уг төслийн нээлт өчигдөр Эрүүл мэндийн яаманд болсон юм. Төслийн хүрээнд дээр дурьдсан байгууллагуудаас гурван сая ам.долларын буцалтгүй тусламж олгосон аж. Эрхийн бичгийн төслийн хөтөлбөр үе шаттайгаар хэрэгжинэ хэмээн зохион байгуулагчид нь мэдээлсэн. Эхний үе шат нь Улаанбаатар хотод өчигдрөөс эхэлсэн бөгөөд ирэх оны нэгдүгээр улирлыг дуустал Хөвсгөл, Хэнтий, Дундговь, Ховд, нийслэлийн Сонгинохайрхан дүүргийн ядуу өрхүүдийг хөтөлбөрт хамруулах юм байна. Харин 2011 ондоо багтаан үлдсэн найман дүүрэг, 17 аймгийн ядуу өрхийн гишүүдийг эрхийн бичгийн хамруулахаар төлөвлөж байгаа ажээ. Эрүүл мэндийн яамнаас энэхүү хөтөлбөрийг 2012 оны эцэсы хүртэл үргэлжилнэ хэмээн тооцож байгаа юм билээ. Энэ хугацаанд нэн ядуу, орон гэргүй, эмзэг бүлгийн иргэд эм, тариа үнэгүй авч, амбулаторийн үзлэг, оншилгоонд үнэ төлбөргүй хамрагдана эмнэлэгт хэвтэж эмчлүүлэх боломжтой болно. Нэг ёсондоо эмнэлгийн хоёр дахь шатлалын үйлчилгээнд хамрагдаж чаддаггүй байсан иргэд эрүүл мэндийн үйлчилгээг үнэ төлбөргүй хүртэнэ. Иргэдэд эм, тариаг улсын хэмжээнд үйл ажиллагаа явуулж буй 357 эмийн сангаар дамжуулж олгоно. Харин эмнэлгийн тусламж, оношилгооны үйлчилгээг орон нутгийн нэгдсэн эмнэлгүүд болон оношлогоо, эмчилгээний төвийн 46 эмнэлэг гүйцэтгэх аж. Улаанбаатар хотын орон гэргүй иргэдийн үйлчилгээг “Энэрэл” эмнэлэг гүйцэтгэхээр болсон байна. Нийслэлд орон гэргүй 1000 орчим хүн байдаг бөгөөд тэднийг хоноглох байр, хоолоор хангах ажил хөтөлбөрт багтаж байгаа. Одоогийн байдлаар энэ үйлчилгээг таван цэг дээр төвлөрүүлж байгаа бөгөөд нэг цэг дээр шөнөдөө 80 орчим хүн ирдэг ажээ.
Эрүүл мэндийн сайд С.Ламбаагаас энэ үеэр зарим зүйлийг тодрууллаа.
-Хөтөлбөр үргэлжлэх хугацаанд гурван сая ам.доллар хүрэлцэх болов уу?
-Монгол Улсын Засгийн газрын хөтөлбөрт эмзэг бүлгийн иргэдэд эрүүл мэндийн тусламж, үйлчилгээг эрхийн бичгээр олгоно гэсэн зорилт бий. Төслийг аймаг, орон нутгийн удирдлагуудаар дамжуулж хэрэгжүүлэх юм. Азийн хөгжлийн банк, Япон улсын ядуурлыг бууруулах сангаас буцалтгүй тусламжаар өгсөн мөнгийг дуусангуут Монгол Улсын Засгийн газар улсын төсвөөс хөрөнгө гаргаж үргэлжлүүлэх юм.
-Эрхийн бичгийн хөтөлбөр нь “Хүний хөгжил сан”-гийн санхүүжилтээс тусдаа гэж ойлгож болох уу?
-Тийм. Огт хамаагүй.
-Монгол Улсын нийт хүн амын тал хувь амьжиргааны түвшнээс доогуур орлоготой гэсэн тооцоо байдаг. Тэгэхээр хөтөлбөрт хамруулах 130 мянган хүнийг хэрхэн сонгосон юм бэ?
-Энэ 130 мянган хүнийг харьяа дүүрэг, хорооноос нь орон гэргүй, ядуу гэдгийг нь тодорхойлчихсон хүмүүс. Орон нутгийн анхан шатны засаг захиргааны нэгжээс нь тодорхойлсон байгаа.
Т.УРАНГЭРЭЛ
Зохиогчийн эрх:
"Улс төрийн тойм" сонин