Монгол Улс, Япон улсын Засгийн газар хооронд байгуул­сан гэрээний дагуу Япон улсын төлөөлөгчид өнгөрсөн сарын 29-нд 570 сая иенийн өртөг бүхий 9.6 мянган тонн цагаан будааг ХХААХҮЯ-ныханд хүлээлгэн өгсөн билээ. Энэ нь манай улсын  цагаан будааны нийт хэрэгцээний 24.2 орчим хувьтай тэнцэх юм. Уг будааг дотоодын зах зээл дээр гаргаснаар цагаан будааны үнийг тогтвортой болгоно хэмээн холбогдох хүмүүс нь хэлж байсан.

Энэ талаар ХХААХҮЯ-ны Тариа­лан эрхлэл­тийг дэмжих сангийн Хан­гамж, борлуулалтын албаны дарга Б.Цогтнарангаас тодрууллаа.

-Япон улсаас манай улсад тусламжийн будаа өгсөн. Энэ будааг хаагуур, хэдэн төгрөгөөр борлуулж байна вэ?

-Япон улс манай улсын цагаан будааны дийлэнх хэрэгцээг хангаж байдаг. Манай улс тус улстай 2008 онд энэ талаар гэрээ байгуулж байсан. Энэ хүрээнд Япон улсаас манай ул­сад КР-1 төслийн шугамаар хямд үнэтэй цагаан будаа ний­лүүлсэн. Яг тусламж бол биш л дээ.  Нийт  9.6 мянган тонн будааг Япон улсаас хүлээлгэж өг­сөн. Одоо будааг “Материал импекс” компанийн агуулахад хад­галж байгаа юм.Тариалан эрхлэл­тийг дэмжих сан борлуу­лах компаниудыг сонгон шалга­­руулж байна. Борлуулж эхлээгүй байгаа.

-Борлуулах компаниудад ямар шалгуур тавьж байгаа юм бэ. Цааш нь дамлачихгүй байгаа?

-Яамны Хүнсний үйлдвэрлэл, худалдаа, үйлчилгээний бодло­гын хэрэгжилтийг зохицуулах газраас үндэсний томоохон сүл­жээ дэлгүүрүүдээр борлуулах шийдвэ­р гаргасан. Бид үүний дагуу зах зээл дээр дамласан үнэ байлгахгүй гэсэн зорилгоор сүлжээ дэлгүүрүүдтэй гэрээ хийж байгаа.  Сүлжээ дэлгүүрүүд зөвхөн жижиглэнгээр борлуулах юм.

-Хэдэн төгрөгөөр борлуулах вэ. Худалдаанд гарч эхлэхээр цагаан будааны зах зээлийн үнэ буурах уу?

-Будааг нэг килограммыг нь 1100 төгрөгөөр борлуулахаар болсон. Зах зээлийн үнэ буурна. Зарим дэлгүүрүүд тусламжийн будаа худалдаанд гарах гэж байгаа сургаар үнээ буулгаж эхэлсэн байна лээ.

-Худалдаанд яг хэзээнээс гарах бол. Бас борлуулсан мөнгийг хаана хуримтлуулах юм бэ?

-Ирэх долоо хоногоос худал­даалж эхлэх байх. Япон улсаас цагаан  будаа тодорхой өртөгтэй орж ирсэн. Буцалтгүй тусламж биш. Тэгэхээр бид цагаан будааг худал­даад Японы КР-1 төсөлд заа­сан өртгийг бүрдүүлнэ. Мон­гол Улсын Засгийн газар, ХХААХҮЯ-наас шийдвэр гар­гаад тээврийн зардлыг оруулаад л зарж байгаа. Бараг л орж ирсэн үнээр нь борлуулж байгаа гэсэн үг.

Т.УРАНГЭРЭЛ