Гуравдугаар сарын дүнг үзвэл Их Британийн аж үйлдвэрийн салбар сүүлийн 15 жилд байгаагүй хурдтай өслөө гэж “BBC” агентлаг мэдээллээ. Худалдан авах удирдлагын индекс хоёрдугаар сард 56.5 байсан бол гуравдугаар сард 57.2 болсон нь эдийн засагчдын хүлээж байгаагүй өндөр үзүүлэлт юм. Үнэндээ энэ бол 1994 оны аравдугаар сараас хойших хамгийн өндөр үзүүлэлт. Их Британийн судалгаа гаргасан хугацаа нь Еврозоны 16 улс, Хятадын сарын судалгаагаа гаргасан хугацаатай давхцаж байна. “Markit”, болон Худалдан авалт, нийлүүлэлтийн институтээс гаргасан судалгаа мөн Их Британи сүүлийн зургаан жилийнхээ оргил өсөлтөн дээр явж байна гэсэн дүн гаргасан байна.

“Markit” судалгааны газрын ахлах эдийн засагч Rob Dobson “өсөлт аль нэг салбарт биш, нийт салбарт нийтлэг байгаа нь илүү удаан үргэлжлэх болно гэсэн найдлага төрүүлж байна” гэж ярьсан. Худалдан авалтын удирдлагын индекс нь бүтээгдэхүүний захиалга, үйлдвэрлэл, ажил эрхлэлтийн байдал, худалдан авалтыг харьцуулсан индекс байдаг. Индекс 50-иас бага байвал эдийн засаг хумигдаж байгаа дохио болдог.

Еврозоны хамгийн том эдийн засаг Германы аж үйлдвэр сүүлийн 10 жилийн өсөлтийн рекордоо мөн эвдээд байгаа бөгөөд хоёрдугаар сард тус индексийн дүн 57.2 байсан бол гуравдугаар сард 60.2 болж нэмэгдсэн байна. Хятадын асар том аж үйлдвэрийн салбарын тэлэлт үргэлжилсээр байгаа бөгөөд хоёрдугаар сарын индекс нь 52 байсан бол гуравдугаар сард 55.1 болж огцом өссөн байна. Энэ нь Бээжинг бодлогын хүүгээ нэмэгдүүлэх шийдвэр гаргахад хүргэж магадгүй юм.

А.Төгөлдөр