Орчин цагийн хүн төрөлхтний агуу их хэрэглээний ноён оргилд эрхэм тэмдэглэлийн дэвтэр, дээгүүр нь дураар хэрэн бүжигч үзэг, харандаа тэргүүтэн заларсаар байгаа билээ. Энгийн нэг модны холтос бидний амьдралын аз жаргал, гуниг гутрал бүхнийг хуваалцан, дэлхий ертөнцтэй танилцуулагч “гайхамшиг” болон хувирч, ажил амьдралыг маань хөтлөн зохицуулж буй. Харин одоо тэрхүү тэмдэглэлийн дэвтэр, харандаа, цааснууд дэгжин даашинз, ихэмсэг малгай, залуусын эрх чөлөөт, эрч хүчит сэтгэлгээг илтгэсэн өмд, гутал, хээнцэр цүнх болон хувирч, анх удаа Монголын загварын тайзнаа амилах гэж байна.

“Чингис” зочид буудлын хурлын зааланд маргааш 19.00 цагт “Rhodia Fashion show” болох гэж байна. Францын нэрт Rhodia /Родиа/ брэндийн дэвтэр, харандаагаар  Урлах эрдмийн дээд сургуулийн чадварлаг дизайнерууд шинэлэг санаа, ур дүй, хүч хөдөлмөр, зүрх сэтгэлээ шингээсэн 80-аад төрлийн загварыг толилуулахаар бэлтгэжээ. Энэхүү шоу нь давхар Урлах эрдмийн дээд сургуулийн залуу дизайнеруудын ур чадварыг сорих тэмцээн болж байгаагаараа онцлогтой юм. Дизайнерууд найман багт хуваагдаж бүтээлээрээ өрсөлдөнө. Уралдааны эхний гурван байрын эзнийг “Clairefontaine-Rhodia” /Клейрфонтэйн-Родиа/ брэндийн бичиг хэргийн бүтээгдэхүүнээр шагнах ажээ.   

Энэхүү сонирхолтой шоуг “Винкс Континенталь” ХХК болон Урлах эрдмийн дээд сургууль хамтран хийж байгаа юм.