Үндэсний аж ахуйн нэгжүүд, бизнес эрхлэгчдийн цуцашгүй хөдөлмөрийн үр дүнд монголын эдийн засаг цус сэлбэн амьдарч явна. Эмч багш, цэрэг цагдаагийн цалин хөлс, албан тушаалтнуудын тансаг хангамжийг тасалдуулахгүй гэж монголын бизнес эрхлэгчид “гүрийцгээж” байна. Хүнд гээд орхисонгүй, хэцүү гээд шантарсангүй. Шуурга сөрөн ажилласаар л байна. Тэдний эрх ашгийг хамгаалан, хууль эрх зүйн таатай орчинг бий болгох үүрэг хүлээсэн тавин жилийн түүхээрээ гайхуулж буй байгууллага уг нь байдаг юм. Нарантуулын лангуун дээр олон жил зогсож буй эмэгтэй, өглөө бүр 07 цагт байрны үүдэнд баттай ирдэг сүүний худалдаачин өвөө харин ийм байгууллага байдаг талаар сонсоогүй биз. МҮХАҮТ- ын үйл ажиллагаа өнгөрсөн хугацаанд шилдэг  гэж тодруулсан хэдхэн компаниар хүрээлүүлэн, тун хязгаарлагдмал орчинд үйл ажиллагаа явуулсаар ирсэн нь үүнээс харагдана. Өнгөрсөн пүрэв гаригт Соёлын төв өргөөнд болсон МҮХАҮТ- ын удирдлагуудын сонгууль нь бизнес эрхлэгчдийн санал шүүмжлэл, харилцан үзэл бодлоо хуваалцсан хэлэлцүүлэг маягаар өрнөсөн юм. Танхимийн үйл ажиллагаа шинэчлэгдэх, идэвхжих зайлшгүй шаардлага байна гэдэг дээр бүгд санал нэгдэж байлаа.

Тус хурал дээр Дэмбэрэл даргын өнөөг хүртэл хийж ирсэн ажлын үр дүн болоод хийгээгүй орхигдуулсан ажлуудыг шүүн хэлэлцсэн. Жижиг, дундчуудыг огт хайхралгүй орхисон, хууль эрх зүйн орчинг сайжруулах тал дээр дорвитой ажил хийгээгүй,  мөн худал үнэн нь мэдэгдэхгүй 100 гаруй аж ахуйн нэгжүүдийг шилдгээр тодруулсан гээд шүүмжлэх зүйл олон байлаа.

Өнгөрсөн хугацаанд танхимын хийж төвдөөгүй зүйлсийн орон зайд “Монгол 999 Үндэсний Нэгдэл” гэх байгууллага хэдийн бий болсон. Богинохон хугацаа өнгөрөөд байгаа хэдий ч ард түмэн, хувийн хэвшлийн  ирээдүйн эрх ашгийг хамгаалан төрд нөлөөлж томоохон шийдвэрийг гаргуулж тэд чаджээ. Ийм гавшгай, хурдтай ажиллагааг л танхимын гишүүд болоод монголын бизнес эрхлэгчид хүсэмжилж байсан нь танхимын дарга болоод удирдлагуудын сонгууль болсон тэр өдөр ажиглагдаж байлаа.

Монголын бизнес эрхлэгчдийн төлөөллүүд санал хураалт явуулж танхимын дээд удирдлагыг сонгосон юм.  Танхимын УЗ- ийн бүрэлдэхүүнд “Монгол 999” нэгдлийн олон гишүүн сонгогдож тус байгууллагыг удирдах боломжтой болжээ. Шинэхэн УЗ нь танхимын даргыг сонгох журамтай.

“Хал үзэж халуун чулуу долоосон” бизнес эрхлэгчдээс бүрдэж байгаа танхимын шинэхэн  УЗ улс төрийн сонгуулийн нэгэн адил даргыг нь огцруулж дуулиан шуугиан тарихыг хүсээгүй гэнэ. Танхимын даргын ажлыг  12 жил  хийсэн дадлага туршлагатай,  боловсролоор гологдохооргүй Дэмбэрэлийг хэвээр үлдээх шийдвэрийг гаргажээ. Нэг нэгнийгээ дарах биш дэмжих, нэгдэж нийлэхийн ач холбогдлыг ухамсарласан баг хэмээн танхимын шинэ ТУЗ-ийг  дүгнэж болохоор байна. Танхимын даргаар олон жил ажилласан Дэмбэрэл түүнд зориулсан шүүмжлэлийг дуулгавартайгаар хүлээн авч цаашид үндэсний бизнес эрхлэгчдийн төлөө өөрийн чадах бүхнийг зориулан ажиллахаа илэрхийлэн өгөөмөр шийдвэр гаргасан УЗ-ийн гишүүддээ баярлаж байгаагаа илэрхийлжээ. Ийнхүү МҮХАҮТ-ын хурал  тус байгууллагад өөрчлөлт шинэчлэлтийн салхийг хагалж ардчилалын уур амьсгалыг бүрдүүлж чадлаа.