Япон улсын буцалтгүй тусламжаар энэ жил нийслэл Улаанбаатар хотод анхны давхар гүүрийг  барина. Хуучнаар Тээврийн товчоо орчмоос төмөр зам болон Нарны зам дээгүүр давуулан Хан-Уул дүүргийн нутаг Цагаан хаалганы чиглэлд барих уг гүүр нь  895 метр урт байх юм. Харин өргөн нь 19,5 метр, автомашин зорчих хэсгийнхээ хоёр талд тус бүр 1,5 метрийн өргөнтэй  явган хүний замтай байхаар зураг төсөл нь гарсан. Энэхүү гүүрэн байгууламжийн барилгын ажлыг өнгөрсөн долоо хоногт эхлүүлээд байгаа юм. Буцалтгүй тусламжийн хүрээнд 36 сарын хугацаанд барьж байгуулах  уг гүүрийг Энгельсийн гүүр хэмээн нэрлэж ирсэн. Зарим хүмүүсээс “Ургах нарны гүүр”, “Сакура гүүр”  зэргээр нэрлэх санал гарч байсан ч НИТХ-ын тэргүүлэгчдийн хурлаар  “Нарны гүүр” хэмээн нэрлэхээр тогтсон байна.

Д.Цээпил