“Рио Тинто” “Чайналко” хоёрын түншлэл улам зузаарч байна. Тэд хамтран Хятадад зэс, нүүрсний хайгуул хийхээр болжээ. “Рио Тинто”-гийн тэргүүн Том Албанез энэ талаар “Бид Хятадтай хамтын ажиллагаагаа улам өргөтгөх болно. Түүнчлэн бүтээгдэхүүн үйлдвэрлээд байх хангалтгүй. Боломжийг илүү их ашиглаж, эрэл хайгуул хийх хэрэгтэй” гэсэн байна. Хятадын хойд, зүүн хойд нутгуудад хайгуул хийх ба 2011 оны эцэс гэхэд энэ ажил дуусах аж. Геологичдын үзэж байгаагаар эндээс нэлээд их хэмжээний нөөцтэй уурхай олдох магадлалтай байгаа юм. “Рио Тинто” 1995 оноос Хятадад хэд хэдэн хайгуул хийж байжээ. Ингэхдээ гол төлөв зэс, никелийн уурхайд анхаарал хандуулж байв. Хайгуулын шинэ төслийн 51 хувийг “Чайналко”, 49 хувийг “Рио Тинто” эзэмших юм. Эхний ээлжинд нийт таван газар хайгуул хийх ба үүний зардалд 10 сая ам.доллар зарцуулахаар болжээ.
Сүүлийн үед олон улсын биржүүд дээр зэс, коксжсон нүүрсний үнэ өсөх хандлагатай байгаа. Хятадын хувьд кокжсон нүүрсний хэрэглээ асар их. Гэтэл эрэлт их байлаа гээд үнийг нь дагаад хөөргөчихөж болохгүй учир тус улс хүчээр хэрэглээгээ бууруулах замаар зах зээлд нөлөөлөхийг оролдож байгаа. Үүнтэй зэрэгцэн дотооддоо хайгуул хийж, шинэ уурхай нээх нь үнийн хэт өсөлтийг зогсооход ашигтай. Зэс алтны нөөцөөрөө дэлхийд тэргүүлж байгаа гэх манай Оюутолгойн ордын бүтээгдэхүүний гол зах зээл нь Хятад. Гэвч 2013 оноос ашиглалтад орохоос нь өмнө Хятадын Засгийн газраас инфляцийг барих зорилгоор мөнгөний бодлогоо хумьж, нөөц ихтэй шинэ уурхайнууд ашиглалтад оруулах бололтой.
“Рио Тинто”, “Чайналко” хоёр зөвхөн шинэ хайгуул хийгээд зогссонгүй, хуучин хөрөнгө оруулалтаа ч өргөтгөжээ. Тэд энэ сарын 2-нд Австралийн өмнөд хэсэг дэх “Channar” төмрийн хүдрийн уурхайн төслийн үйл ажиллагааг өргөжүүлэх зорилгоор хамтын хөрөнгө оруулалттай “Sinosteel” корпорацитай шинэ гэрээ үзэглэжээ. Анхны тооцоогоор уг уурхайгаас 2012 он гэхэд 200 сая тонн бүтээгдэхүүн гаргах төлөвлөгөөтэй байсан. Харин “Sinosteel”-тэй хийсэн шинэ гэрээ нь төмрийн хүдрийн олборлолтыг нэмэгдүүлэхэд чиглэсэн. Тийм ч учраас шинэ гэрээний дагуу 2012-2017 онд 50 сая тонн төмрийн хүдэр нэмж үйлдвэрлэнэ гэх урьдчилсан тооцоог компанийн мэргэжилтнүүд нь гаргажээ.
Өнгөрсөн намар “Рио Тинто” “BHP Billiton”-той хамтран Австралийн төмрийн хүдрийн уурхайд хөрөнгө оруулах сонирхолтой байгаагаа илэрхийлсэн. Гэвч энэ нь нутгийн иргэдийн зүгээс хүчтэй эсэргүүцэлтэй тулгарч, цаашлаад үнийн чөлөөт өрсөлдөөнийг үгүй хийнэ гэх болгоомжлолыг австраличуудын дунд төрүүлсэн билээ. Үүнээс дэлхийн уул уурхайн гигант хоёр компани хамтын хөрөнгө оруулалтаа зогсоохоос өөр аргагүй болсон юм. Энэ талаарх шийдвэр гараад удаагүй байтал ийн “Чайналко” “Рио Тинто”-той хамтын ажиллагаагаа өргөтгөхөөр болжээ. “Рио Тинто”-гийн хувьд “Sinosteel”-ийн бүтээгдэхүүний гаралтыг 50 сая тонноор нэмэгдүүлэх сонирхолтой байгаа юм. Тус компани саяхан Пилбара дахь “Syncline” уурхайд 1.2 тэрбум ам.долларын хөрөнгө оруулалт хийхээр шийдвэрлэсэн. Мөн өнгөрсөн есдүгээр сард тус бүс нутагт нэмж 2.1 тэрбум ам.долларын хөрөнгө оруулалт хийх болсноо мэдэгдэж байсан юм. Өнгөрсөн долдугаар сард тус компани ойрын таван жилийн төлөвлөгөөндөө Пилбара дахь уурхайнуудын бүтээгдэхүүний гарцыг 50 хувиар нэмэгдүүлнэ хэмээн тусгажээ. Тиймээс уг зорилтдоо хүрэхийн тулд шаргуу “хөдөлмөрлөж” байгаа нь энэ юм. Түүнээс гадна Австралийн алмазны “Argyle” уурхайд 800 сая ам.доллар, Гвинейн “Симанду”-д “Чайналко”-той хамтран 563 сая ам.долларын хөрөнгө оруулалт хийхээр болсон.
Ирэх он гэхэд хөрөнгө оруулалтаа гурав дахин нэмэгдүүлнэ гэх урьдчилсан прогнозтой байгаа “Рио Тинто”-гийн хувьд тэр их бүтээгдэхүүнийг нь шингээх урт хугацааны хамтын ажиллагаа бүхий газар байх хэрэгтэй нь ойлгомжтой. Тэр зах зээл нь Хятад гэдэгтэй ч маргах аргагүй. Ирэх 2012 он гэхэд дэлхийн төмрийн хүдэр, зэс, хөнгөн цагааны эрэлт хоёр дахин нэмэгдэх тооцоо байгаа. Үүний гол хөдөлгөгч хүч нь Хятад юм.
“Рио Тинто” өмнө нь Хятадын “Чайналко”-гийн хөрөнгө оруулалтаас татгалзаж, 19.5 тэрбум ам.долларын торгууль төлж байв. Гэтэл өнгөрсөн хавраас компанийнхаа гурван ажилтныг золионд гарган байж, буруугаа хүлээн “Чайналко”-г шинэ түншээрээ сонгосон юм. Тухайн үед “Bloomberg”-ийн мэдээлж байснаар шинэ гэрээ хийгдсэнээр хөнгөн цагаан, зэс, төмрийн хүдрийн хамтарсан компаниудыг байгуулах стратегийн түншлэл бий болжээ. “Чайналко” Австралийн Квинслэндэд орших “Рио Тинто”-гийн мэдлийн Вейпагийн бокситын уурхайн 30 хувийг шууд бусаар, Чилийн Атакамын цөлд байрладаг зэсийн Эскондид төсөлд “Рио Тинто”-гийн эзэмшдэг 49.75 хувийг, Индонезийн зэс алтны Грасберг уурхайн 30 хувийг шууд бусаар эзэмших болсон. Үүнээс гадна өөр олон уурхай, боловсруулах үйлдвэрүүдийн тухай яригджээ. Харин манай Оюутолгой төсөл яах бол гэх болгоомжлол нэлээд газар авсан. Өнгөрсөн долдугаар сард “Чайналко”-гийн удирдлага Монголын Оюутолгойд хөрөнгө оруулж, хамтрах сонирхолтой байгаагаа албан ёсоор илэрхийлсэн. “Рио Тинто” ч түүнийг нь дэмжих бодолтой байв. Харин “Айвенхоу Майнз” үүн дээр нь дөрөөлж, жижиг хувьцаа эзэмшигчийн эрхийг хамгаалсан баримт бичиг гээч юм гаргаж ирсэн билээ. Үүнээс болж Канадын арбитрын шүүхэд дуудагдаж, асуудал одоо хүртэл эцсийн шийдээ олоогүй байна.
Дэлхийн түүхий эдийн зах зээлийн эрэлт Хятадаас хамааралтай болсон энэ цаг үед “Рио Тинто” дахь “Чайналко”-гийн эрх мэдэл улам нэмэгдсээр байх юм.
Дашрамд дурьдахад “Wikileaks”сайтад “Рио Тинто”-гийн тухай шинэ мэдээлэл тавигджээ. “Рио Тинто”, “Чайналко” хоёр хамтран ажиллах эхний оролдлого бүтэлгүйтэж, торгууль төлж байсан тухай дээр дурьдсан. Үүнд уул уурхайн гигант “BHP Billiton” Австралийн Засгийн газарт лобби хийсэн нь нөлөөлсөн гэж “Wikileaks” сайтад уржигдар мэдээлжээ. Одоогийн байдлаар Австралийн Засгийн газар сайтын мэдээлэлд албан ёсны хариу өгөөгүй байна.
Т.ЭЛИСА
"Улс төрийн тойм" сонин