Үндэсний статистикийн хороо­ноос өнгөрсөн арваннэгдүгээр сарын ний­гэм, эдийн засгийн үзүүлэлтийг танил­цууллаа. Мэдээ­лэлд дурьдсанаар өнгөрсөн сард макро эдийн засгийн сал­ба­рын үзүүлэлтэд нэлээд өсөлт гарсан нь ажиглагдлаа. Тэр дун­даа аж үйлдвэрийн салбарын бүтээг­дэ­хүүний нийт үйлдвэрлэл 1.685 тэрбум төгрөгөөр өсчээ. Энэ нь өмнөх оны мөн үеийнхээс 180 тэрбум төгрөг буюу 12 хувиар өссөн үзүүлэлт юм. Аж үйлдвэрийн салбарын энэхүү өсөл­төд газрын тос, хайлуур жоншны баяжмал, нүүрс зэрэг уул уурхайн гол­лох нэр төрлийн бүтээгдэхүүний үйлд­вэрлэл 23-94 хувиар өссөн нь нөлөөл­сөн байна. Мөн катодын зэс, ган төмөр хийц, шохой, архи, дарс, ундаа, сүлжмэл эдлэл, металл бэл­дэц, зүсмэл материал, төмөр бетон эдлэл зэрэг боловсруулах аж үйлд­вэрийн салбарын голлох нэр төр­лийн бүтээгдэхүүний үйлдвэрлэл 11-78 хувиар өссөн нь дээрх үр дүнг авч­рахад нөлөөлсөн байна. Түүнээс гадна суурь металлийн үнэ дэлхийн зах зээл дээр тогтвортой байгаа нь дээрх өсөлтийг удаан барих нөхцөлийг бүр­дүүлж байгаа аж.

Макро эдийн засгийн хувьд төсвийн урсгал орлого энэ оны эх­ний 11 сард 2.602 тэрбум төгрөг болж, урсгал тэнцлийн хувьд 669 тэр­бум төгрөгийн ашигтай гарчээ. Мөн татварын нийт орлого өмнөх оны мөн үеийнхээс 916 тэрбум төгрөг буюу 65.3 хувиар нэмэгдсэн байна. Тат­варын бус орлого ч нэмэгдэж өмнөх оны мөн үеийнхээс 6.3 тэрбум төг­рөгөөр өсчээ. Харин гадаад худал­дааны хувьд манай улс энэ оны эхний 11 сарын байдлаар дэлхийн 130 оронтой худалдаа хийж, гадаад ху­дал­дааны нийт бараа эргэлт 5421 сая доллараар үнэлэгдэж байна. Үүнээс экспортын хувьд 2550 сая дол­лар, импорт 2871.1 сая долларт хүр­чээ. Нийт барааны эргэлт өмнөх оны мөн үеийнхээс 1831 сая доллар буюу 51хувиар өсч, экспорт 52 хувь, импорт 50 хувиар тус, тус өссөн байна. Экспортын 94.8 хувийг зэс, нүүрс, нэхмэл эдлэл, үнэт ба хагас үнэт чулуу, үнэт металл, гоёлын зүйл эзэлж байна.

Харин эдийн засгийн дээрх үзүү­лэлт ажилгүйдэл буурсан гэх таатай мэ­дээллийг дагуулсангүй. Аймаг, нийс­лэлийн хөдөлмөр, халамжийн үйл­чилгээний хэлтэст бүртгэлтэй, ажил идэвхтэй хайж байгаа иргэ­дийн тоо арваннэгдүгээр сарын эцэст 41 мянга болж, өмнөх оны мөн үеийнхээс 1000 шахам хүнээр бу­юу 2.2 хувиар өсчээ. Бүртгэлтэй ажил­гүй иргэдийн тоо өмнөх оны мөн үеийнхээс Баянхонгор (157 хүн), Ховд (293 хүн), Дундговь (299 хүн), Хэнтий (333 хүн), Архангай (430 хүн), Төв (439 хүн), Өмнөговь (472 хүн), Завхан аймагт (881 хүн) өссөн нь ажил­гүй иргэдийн тоо өсөхөд голлон нөлөөлжээ. Харин ул­сын хэмжээнд энэ оны эхний 11 са­рын байдлаар 17933 гэмт хэрэг бүрт­гэгдсэн нь өмнөх оны мөн үеийнхээс 650 хэрэг буюу 3.5 хувиар буурсан байна.­­­

Т.ЕСӨН-ЭРДЭНЭ