Цагаатгах ажлыг удирдан зохион байгуулах улсын комисс байгуулагдаад 20 жил болж байна. Тус ойн хүрээнд УИХ-ын дэд дарга,  Цагаатгах ажлыг удирдан зохион байгуулах улсын комиссын дарга Нямаагийн Энхболд тус комиссын даргаар ажиллаж байсан  Ж.Гомбожав, До.Ганболд, Ж.Бямбадорж, комиссын нарийн бичгийн дарга асан Ө.Ганхуяг,Н.Сампилноров нарыг  өчигдөр хүлээн авч уулзаж хүндэтгэл үзүүллээ.

Энэ үеэр УИХ-ын дэд дарга, комиссын дарга Н.Энхболд цагаатгалын ажлын явц, тулгараад буй асуудлын талаар  тэдэнд товч танилцуулахдаа, цагаатгалын ажил дуусах шатандаа ороод байгаа  бөгөөд хэлмэгдүүлэлт гарах болсон шалтгаан, нөхцлийн талаар нэгдсэн нэг ойлголт, дүгнэлтэд хүрэх нь чухал байна гэдгийг тэрээр онцлон тэмдэглэв.

Уулзалтад оролцогсод  цаашид улс төрийн хэлмэгдүүлэлтийг дахин гаргуулахгүй байх орчин нөхцлийг бий болгох, хэлмэгдүүлэлтээс урьдчилан сэргийлэх, хэлмэгдүүлэлтийн талаар суурь судалгаа хийх, нийгмийг соён гэгээрүүлэхэд  Цагаатгах ажлыг удирдан зохион байгуулах улсын комисс гол үйл ажиллагаагаа чиглүүлэх шаардлага байгаа талаар санал бодлоо илэрхийллээ гэж Комиссын Хэвлэл,мэдээллийн албанаас мэдээлэв.