Амь үрэгдсэн эмэгтэйн ар гэрийнхэн Cолонгосыг зорилоо | News.MN

Амь үрэгдсэн эмэгтэйн ар гэрийнхэн Cолонгосыг зорилоо

Хуучирсан мэдээ: 2010.12.10-нд нийтлэгдсэн

Амь үрэгдсэн эмэгтэйн ар гэрийнхэн Cолонгосыг зорилоо

Өнгөрөгч есдүгээр сарын 16-ны өдөр  БНСУ-ын Чоннам Нажүд амьдардаг Монгол Улсын иргэн 26 настай эмэгтэй Г  найз  эмэгтэй Х-ийнхээ  солонгос нөхөрт хутгалуулан амь насаа алдсан хэрэг гарсан. Талийгаач Г-нь зургаан сар­тай хүүхэдтэй, өнгөрсөн оны арванхоёрдугаар сард солон­гос хүнтэй гэрлэн тус улсад амьдарч  байжээ. Хүний амь санаатай хөнөөсөн Янг-д хол­богдох хэргийн шүүх хурал өнгөрөгч сарын 14-нд болох байсан ч тодорхойгүй шалтгаанаар хойшилж  энэ сарын 14-нд болохоор тов­логд­сон. Энэ сард болох шүүх хуралд талийгаач Г-ийн ээж, төрсөн ах, өмгөөлөгч  нарын гурван хүн монголын талаас оролцохоор өчигдөр Улаанбаатар-Сөүлийн нис­лэгээр БНСУ-ыг зорьсон юм. Талийгаачийн ээж н.Наран­­туяаг Солонгос улс руу нисэхээс нь өмнө цөөн асуултад хариулт авлаа.
 
-Солонгос улсад шүүх хуралд оролцох гэж байгаа та бүхний зардлыг хаанаас гаргасан бэ?

-Миний зардлыг НХХЯ-наас Гадаадад ажиллах хүч илгээх төвөөс өгсөн. Харин өмгөөлөгчийн зардлыг би өө­рөө нэг сүмээс гуйж гар­гуулсан юм. Хүү маань өөрөө цалингаа хурааж, хувиасаа зардлаа гаргаж байгаа.

-Онгоцны  зардалд нэг хүнд хэдэн төгрөг зарцуулж байна. Замын зардлаас гадна хоол, орон байранд  зарцуулах мөнгө бий юу?

-Зөвхөн замын зардалд нэг хүн ирэх очихын 800 орчим мянган төгрөг болж байна лээ. Очоод байрлах байр, хоол ундаа хэрхэхээ мэдэхгүй л байна. Замын зардлаа арай ядаж олсон хүмүүс чинь хэцүү юмаа. Өмгөөлөгч маань байрлах байраа өөрөө аргалъя гэсэн. Том охин маань уг нь талийгаачийн амьдарч байсан дүүргийн ойролцоо амьдардаг. Гэхдээ Сөүлээс бол хол юм билээ.  Очиж байгаад болох байх л гэж бодож байна.

-Солонгосын эмэгтэй­чүү­дийн холбоотой холбоо барьсан уу. Очоод хаана хандах вэ?

-Өнөөдөр/өчигдөр/ гараад шөнөдөө очих байх. Маргааш өглөө шууд л Солонгос улс дахь Элчин сайдын яаманд  хандана. Тэгээд л шүүх хуралд хэрхэн оролцох талаар заавар зөвлөгөө авна даа. Гадаад харилцааны яамнаас бидэнд ийм чиглэл  өгсөн л дөө.

-Шүүх хуралд Монгол Улсаас явж буй өмгөөлөгч ямар үүрэгтэй оролцох юм бол?
-Шүүх хуралд сууж болох эсэхийг сайн мэдэхгүй байна. Ямар ч гэсэн тэнд ажилладаг Солонгос өмгөөлөгчтэй уул­заж, хэрхэн өмгөөлөл явуулах талаар зөвлөлдөнө гэсэн чигтэй байгаа.

-Хандивын данс нээгээд багагүй хугацаа өнгөрлөө. Ойр зуур хэрэглэх мөнгө цугларсан уу?

-Монголын эмэгтэйчүү­дийн холбооноос 108 мянган төгрөг, Булган аймгийн Да­шин­чилэн сумынхан маань 200 мянган төгрөг хандивласан байна лээ. Том охин Булган аймагтаа ажиллаж байсан юм. Түүнээс өөр мөнгө ороогүй байсан. Гэхдээ бага гэж чамлаад яахав. Олон түмэн боломжийнхоо хэрээр тусалж, сэтгэл санаагаар дэмжиж бай­гаад баярлаж байна.

-Гадаад харилцааны яам­наас мөнгөн тусламж өгсөн үү?

-Охины маань оршуулгын  зардалд таван сая төгрөг өгсөн. Солонгос явах гээд хүмүүсээс мөнгө төгрөг зээлсэн байснаа төлөөд л дууссан даа.

-Та хүргэнтэйгээ холбоо­той байгаа юу. Шүүх хурлын талаар мэдээлэлтэй байна уу?

-Огт харилцаагүй байгаа. Хэлний бэрхшээлээс болоод хэл авалцахад хэцүү юм. Том охин  Солонгост зээ хүүг минь харж байсан ч хүргэний ээж нь дургүйцээд больсон гэсэн. Уг нь охиноороо дамжуулж  л ганц нэг юм асууж лавладаг байсан юм.  

С.Отгон

0 сэтгэгдэл

News.mn сайтад сэтгэгдэл оруулахад анхаарах зүйлс

Avatar

Зочин 2010-12-10 202.61.97.25

англи хэл дээр уран зохиолын номыг ойлгож уншиж сурах курс хичээллэж байна 99922603

NewsMN Гар утасны хувилбар Татах
NEWS.mn

Мэдээллийн эх сурвалж