БНХАУ-ын нөлөө Африкийн орнуудад нэмэгдэж байгаа явдалд АНУ-ын зүгээс анхааралдаа авч байгааг “WikiLeaks”-ээс дэлгэсэн АНУ-ын дипломат албаны нууц материалууд харууллаа. Энэ оны хоёрдугаар сард тэмдэглэгдсэн энэ эх сурвалжид дурдсанаар Нигерийн нийслэл Лагос дахь АНУ-ын нөлөө бүхий албан тушаалтан БНХАУ-ыг Африкт “хортой, түрэмгий” аашилж байгаа гэж бичжээ. Гэхдээ энэ нь цэрэг, аюулгүй байдал эсвэл тагнуулын тал дээр бус гэжээ. Одоогийн байдлаар “WikiLeaks” АНУ-ын дипломат сувгийн 251,000 нууц материалаас 1100 гаруйг нь дэлгээд байгаа юм.

ВВС агентлагт бичсэнээр энэ нь Вашингтоны зүгээс Африк тивд Бээжинтэй өрсөлдөж байгааг харуулсэн явдал боллоо.

“Guardian” сэтгүүлд тавигдсан энэ материалд Африкийн асуудал хариуцсан АНУ-ын туслах нарийн бичгийн дарга Жони Карсоны үг бичигдсэн байгаа юм. “Хятад улс Африкт энэрэнгүй сэтгэлийн улмаас байгаа юм биш. Хятад тэнд Хятадынхаа л төлөө байгаа. Хоёр дахь шалтгаан нь НҮБ-д Африкийн орнуудын дэмжлэгийг авах явдал” гэсэн байна.

Өөр нэг эх сурвалжид БНХАУ-ын зэвсэгт хүчин, тагнуулын албаныхан Кенийн Засгийн газрыг дэмждэг тухай дурдсан байв. Кенийн эрх баригчид БНХАУ-д айлчлах үеэр Хятадын компаниас их хэмжээний хахууль төлж, бараа нийлүүлэх гэрээ байгуулсан гэжээ. Хахууль авсан албан тушаалтны нэрийг энд нууцалсан байна.

Э.Очирт