УИХ-ын гишүүн Г.Баярсайханаас “Хүний дархлал хомсдолын виру­сийн халдвар, дархлалын олд­мол хомсдолоос сэргийлэх тухай хуулийн хэрэгжилтийн талаар Эрүүл мэндийн сайдад тавьсан асуулга”-ын хариуг чуулганы хуралдаан дээр Эрүүл мэндийн сайд С.Ламбаа өглөө. Манай улсад анх 1992 онд Хүний дархлал хомсдолын вирусийн халдвар бүртгэгдсэнээс хойш энэ оны эхний 11 сарын байдлаар 83 тохиолдол бүртгэгдээд байгаагийн бүх тохиолдол нь бэлгийн замаар дамжсан, халдварын тохиолдлын 65.3 хувь 2007 оноос хойш онош­логдсон байна. Халдвар авсан хүмүү­сийн  24 нь гадаад ажиллаж амьдарч байсан бол дөрөв нь гадаад орноос манай улсад түр оршин сууж байсан иргэдээс халдвар авсан нь тогтоогдсоныг Эрүүл мэндийн сайд С.Ламбаа танилцуулгадаа дурьдав. Мөн халдвар авагсдыг насны хувьд ангилж үзэхэд тав нь 15-19, 15 нь 20-24, 24 нь 25-29, 12 нь 30-34, 13 нь 35-39, 12 нь 40-45, нэг нь 45-50 хүртэлх насны хүмүүс байгаа, халд­вартай таван эхээс төрсөн таван хүүхэд халдваргүй амьдарч байгааг хэллээ. Мөн тэрээр “Манайх ХДХВ-ийн тархалт багатай орны тоонд орж байгаа боловч хэрэгжүүлж буй арга хэмжээг бууруулахгүй” гэсэн бөгөөд ХДХВ-ийн талаар гарсан статистик мэдээнээс цаашдын төлөвлөгөөг боловсруулан гаргах боломжтой гэлээ. Энэ хугацаанд Эрүүл мэндийн яам­ны зүгээс “ХДХВ-ийн эсрэг Үндэсний стратегийг бий болгосон. Мөн Эрүүл мэндийн сайдын тушаа­лаар ХДХВ-ийн удирдамжийг батал­­сан. Глобал сан болон олон улсын байгууллагуудтай хамтран шин­жилгээ хийх боломжийг бий болгосон зэрэг дэвшилттэй зүйл олон гарсан” гэсэн байна.