Монголын хөрөнгийн бирж энэ долоо хоногт нийтдээ таван удаа үнэт цаасны арилжаа явуулж нийтдээ 45 компанийн 678.8 мянган ширхэг хувьцааг 271.6 сая төгрөгөөр арилжлаа.

Топ-20 индекс 14245.40 нэгж байгаа нь өмнөх долоо хоногийнхоос 258.7 нэгжээр буюу 1.8 хувиар өсчээ. Индексийн сагсад багтах Монгол шилтгээн /51.2 хувь/, АПУ /8.9 хувь/, МЦХ /6.5 хувь/, БиДиСек /6.2 хувь/, Хөх ган /1.3 хувь/ зэрэг ХК-иудын үнэт цаасны ханш өссөн нь индексийн өсөлтөд нөлөөллөө. Зах зээлийн нийт үнэлгээ 19.4 тэрбум төгрөгөөр буюу 1.5 хувь өсч, 1 их наяд 336.3 тэрбум төгрөг болсон байна.

Ханш нь өссөн үнэт цаасны тоонд Баянтээг /100.8 хувь/, Силикат /51.7 хувь/, Монгол шилтгээн /51.2 хувь/, ханш нь буурсан үнэт цаасны тоонд Монгол дизель /14.3 хувь/, Гермес центр /8.6 хувь/, Монгол керамик /8.3 хувь/ зэрэг ХК-иудын үнэт цаас орж байна.

Нийт 45 үнэт цаас арилжигдсанаас 24 үнэт цаасны ханш өсч, 13 үнэт цаасны ханш буурч, найман үнэт цаасны ханш тогтмол байлаа.

Тоо ширхгээр хамгийн олон ширхэг арилжигдсан үнэт цаасанд Хөх ган /420.2 мянган ширхэг/, Гермес центр /147.2 мянган ширхэг/, Хай би ойл /19.6 мянган ширхэг/ ХК-ийн үнэт цаас орж байна.

Үнийн дүнгээр Хөх ган /64.9 сая төрөг/, Багануур /48.2 сая төгрөг/, Говь /30.8 сая төгрөг/ ХК-ийн үнэт цаас хувьцааны арилжааг тэргүүлж байна.