Арван жилийн тогтворгүй байдалд цэг тавина гэж хүлээсэн Кот Д’Ивуар /Зааны ясан эрэг/ улсын сонгогчид ням гаригт шинэ ерөнхийлөгчийн төлөө саналаа өгсөн билээ. Гэтэл сонгуулийн хорооноос ням гаригийн шөнө дууссан санал хураалтын дүн гарсан гэсэн ч олон нийтэд зарлаагүй байсан юм. Энэ нь иргэдийн дунд бухимдал үүсгэж, сонгуулийн луйвар үүслээ хэмээж байсан юм. Харин сонгуулийн дүнг нийтэд зарласан ч Засгийн газраас үр дүнг баталгаажуулахаас татгалзсан байна.

Одоогийн Ерөнхийлөгч Лорент Гбагбо өмнө нь Ерөнхий сайдын алба хашиж байсан ОУВС-гийн ахмад зүтгэлтэн Алассане Оуаттаратай өрсөлддсөн юм.  Ноён Оуаттара 54,1 хувийн санал авч ялалт байгуулсан гэсэн дүнг гаргасан ч одоогоор Засгийн газрын зүгээс дахин нягтлах ёстой гэжээ. Сонгуулийн коммисс саналын хуудсыг дахин тоолох болсон бөгөөд үүнд сонгуульд өрсөлдөгч талууд ямар нэг байдлаар нөлөөлөхийг хориглох юм.    

Кот Д’Ивуар нь какаоны үйлдвэрлэлтээр дэлхийд тэргүүлдэг билээ. Сонгууль шударга болсон эсэх нь тун эргэлзээтэй байгаа аж. Учир нь гурван санал хураалтын байр руу зэвсэглэсэн этгээдүүд довтолж, хамгаалалтын таван ажилтны амийг хөнөөсөн хэрэг санал хураалтын үеэр болсон байна. Кот Д’Ивуар улс 2002-2003 оны иргэний дайны дараа хоёр хуваагдаж, хойд хэсэгт цэргийн босогчид эрх мэдлээ тогтоосон юм.

Э.Очирт