Төрийн ордонд Тэргэнцэртэй иргэдийн холбооныхон гэрэл зургын үзэсгэлэн гаргаж байна. Уг үзэсгэлэнд хөгжлийн бэрхшээлтэй иргэдийн асуудлыг хөндсөн бөгөөд явуулж буй үйл ажиллагаа, ололт амжилтаа ч мөн харуулахыг зорьсон аж.

Зургийн үзэсгэлэнг УИХ-ын зарим гишүүд сонирхсон бөгөөд тэдэнтэй уулзан санал солилцсон байна. УИХ-ын гишүүн Ш.Сайхансамбуу хөгжлийн бэрхшээлтэй иргэдийг хаана цугладаг талаар сонирсон бөгөөд тийм газар бий болгох талаар анхаарал тавихаа илэрхийллээ. Мөн УИХ-ын гишүүн Х.Наранхүү гар үйлдвэрлэлийн бүтээгдэхүүнийг нь борлуулах суваг бий болгох талаар санаачлага гаргахаа хэллээ.  
1992 оны Нэгдсэн Үндэсний байгууллагын шийдвэрээр жил бүрийн арванхоёрдугаар сарын 3-нийг Хөгжлийн бэрхшээлтэй иргэдийн эрхийг хамгаалах олон улсын өдөр болгон зарласан байна. Үзэсгэлэнг зохион байгуулагчид энэ өдрийг Мянганы хөгжлийн зорилтод Хөгжлийн бэрхшээлтэй иргэдийн асуудлыг тусгах зорилготой байгаагаа танилцуулж хөгжлийн бэрхшээлтэй иргэд зөвхөн халамж хүртдэг гэх хандлагыг өөрчлөх шаардлагатай байгаагаа илэрхийллээ.