Саяхан улсын хэмжээнд хүн ам, орон сууцны нэгдсэн тооллого явагдаж, тооллогын урьдчилсан дүн мэдээ гарчээ. Улсын хэмжээнд  2 сая 650 мянга, 673 хүний маягт, мэдээлэл хүлээн авсанаас, Хөвсгөл аймагт 113 мянга 982 иргэн хамрагдсан байна. Тооллогын эцсийн дүн мэдээ 2011 оны хоёрдугаар сарын 20-нд гарах аж. Улсын хэмжээнд орон гэргүй өрх 915 тоологдсоны 700 гаруй нь нийслэлд байгаа гэнэ. Хөвсгөл аймгийн Мөрөн суманд зарим тоологчдын хариуцлагагүйгээс үүдэн хүний овог нэр сольж бүртгэсэн, урьдчилсан судалгаагаар Мөрөнд байсан хүнийг хөдөө амарч байхад нь бэлнээр тоолох, тэр нь хөдөө байгаа газраа тоолуулсан зэрэг зөрчил гарсан байна.