IJF буюу Олон улсын жүдо бөхийн холбооны дэлхийн цом ангилалд багтах олон улсын тэмцээн Өмнөд Солонгосын Сувон хотноо энэ сарын 3, 4-нд болох гэж байна. Тус тэмцээнд оролцох Монголын жүдо бөхийн шигшээ багийн тамирчдын түрүүч мягмар гаригт эх орноосоо морджээ. Одоогоор манай тамирчдаас Монгол Улсын Хөдөлмөрийн баатар Х.Цагаанбаатар, Н.Түвшинбаяр нар, мөн Б.Тэмүүлэн, О.Ууганбаатар, Ч.Болдбаатар, Г.Болдбаатар, Х.Мөнхбаатар, Д.Төмөрхүлэг, Э.Энхбат нар Сувонд байгаа бол үлдсэн тамирчид визний асуудлаа шийдээд хойноос нь очих ажээ.

Энэ удаагийн Сувоны дэлхийн цомын тэмцээнд нэг жинд нэг улсаас дөрвөн тамирчин оролцох эрхтэй учир Монголын жүдочид өргөн бүрэлдэхүүнтэй оролцох юм. Тэмцээний хуваарийн дагуу 3-нд хөнгөн жингийн буюу эрэгтэйчүүдийн 60, 66, 73, эмэгтэйчүүдийн 48, 52, 58, 69 кг-ын жинд аваргууд тодрох бол 4-нд үлдсэн жингийн барилдаанууд болж, алт, мөнгө, хүрэл медалийн эзэд тодрох ажээ.

Манай жүдочид тэмцээн өндөрлөсний дараа 5-7-ны өдрүүдэд олон улсын тамирчдын хамтарсан бэлтгэлд оролцоод тэндээсээ шууд Япон улсыг зорьж, Токио хотноо энэ сарын 11-13-нд болох IJF-ийн их дуулгын тэмцээнд оролцох юм байна.