Даваа гаригт Оросын холбооны улсын Гадаад хэргийн сайд Солонгосын хойг дахь одоогийн нөхцөл байдалд туйлын их түгшиж байгаагаа илэрхийлж, хойгийн хурцадмал байдлыг намжаахад Бүгд найрамдах Солонгос улс болон Бүгд найрамдах ардчилсан Солонгос ард улсыг хамтран ажиллахыг шаардсан байна.

“Талуудын хооронд яриа хэлэлцээр бага хийгдэж байгаагийн зэрэгцээ өндөржүүлсэн цэргийн бэлэн байдал тогтоосон нь нөхцөл байдлыг улам ноцтой болгож байна” гэж Орос улсын Гадаад хэргийн сайдын орлогч Алексей Бородавкин ОХУ-д суугаа Өмнөд Солонгосын элчин сайд Ли Юнхөтэй уулзсаны дараа хэлжээ.

Бородавкин “Хоёр улсын хооронд үүссэн хурцадмал байдлыг тайван болгоход яаралтай туслалцаа хэрэгтэйг мөн ямар ч тохиолдолд зэр зэвсэг, цэргийн хүчийг ашиглахгүй байх нь зүйтэй” гэдгийг онцолсон байна.

Ням гаригт Хятад улс ирэх сард төлөөлөгчдийн тэргүүдтэй Солонгосын хойгийн хурцадмал байдлын талаар хийх “Зургаан талт хэлэлцээр”-ийг яаравчлах санал гаргасан билээ.

Зургаан талт хэлэлцээрт БНХАУ, БНАСАУ, БНСУ, АНУ, ОХУ болон Япон улсын төлөөлөгчид оролцдог бөгөөд 2003 онд хэлэлцээр эхэлсэн ч, 2009 оны дөрөвдүгээр сард БНАСАУ татгалзсанаар уг хэлэлцээр зогссон ажээ.

Б. Энхцэцэг