Украины улстөрч, “Батькивщина” намын лидер, тус улсын ерөнхий сайдаар 2005 ба 2007-2010 онуудад ажиллаж байсан Юлия Владимировна Тимошенко өнгөрсөн 27-ны өдөр 50 насныхаа ойг тэмдэглэжээ.

Юлия Владимировна Тимошенко 1960 оны арваннэгдүгээр сарын 27-нд  Днепропетровск хотод төржээ. Днепропетровскийн их сургуулийн эдийн засгийн факультетыг эдийн засагч мэргэжлээр 1984 онд дүүргээд хотынхоо Ленины нэрэмжит машин тө­хөөрөмж үйлдвэрлэх заводод эдийн за­сагчаар 1988 он хүртэл ажиллав. Эдийн засгийн ухааны дэд док­торыг “Татварын системийн төрийн зохицуулалт” сэдвээр 1999 онд Киевын үндэсний их сургуульд хамгаалжээ.

Нөхөр Александр Тимошенкогийн хамт 1988 онд видео салон нээсэн байв. Юлия Тимошенко 1989-1991 он “Тер­минал” гэх залуу­чуу­дын тө­вийн арилжааны захирал байлаа. “Украины бензин” (КУБ) кор­пора­цийн арилжааны болон ерөн­хий за­хир­лаар 1991-1995 онд ажиллан шата­хуун, тос нийлүүлэх бизнесийг хийж байжээ.

Тимошенко 1995-1997 онд “Украины эрчим хүчний нэгдсэн сис­тем” гэх санхүү, эдийн засгийн корпорацийн (ФПК “ЕЭСУ”) ерөн­хийлөгч байгаад ерөнхий сайд Павел Лазаренког огцорсны дараа тушаалаа өгчээ.  1997-1999 онуудад “Громада” нэгдлээс нэр дэвшин Дээд радын депутат болсон байв. 1998 оноос парламентын Төсвийн байнгын хороог удирджээ.  Бүх Ук­раи­ны нэгдлийн “Батькивщина” намыг 1999 онд байгуулан дарга нь болсон юм. Юлия Тимошенко 1999-2001 онд ерөнхий сайдын түлш эрчим хүч хариуцсан орлогч байв. “Украины эрчим хүчний үзэл баримтлалыг” тэрээр боловсруулсан хүн юм. Ерөнхий прокурор түүний эсрэг эрүү үүсгэсний дараа огцорч, нэг тэрбум ам.доллар завшсан гэх хэргээр баривчлагдсан байв. Киевын Печерийн районы шүүх ялыг үндэслэлгүй гээд баривчлах шийдвэрийг нь хэрэгсэхгүй болгон шоронгоос сулласан юм.

Юлия Тимошенко 2001 онд сөрөг намуудын “Үндэстнээ аврах форум” гэх олон нийтийн байгууллагыг байгуулан лидер нь болсон юм. Тэр жилийнхээ арваннэгдүгээр сард форумаа Юлия Тимошенкогийн эвсэл (ЮТЭ) болгон 2002 оны сонгуульд оролцон 20 суудал авсан байв. Тэрээр Дээд радын ардын депутатаар 2002-2005 онд  сонгогдсон байлаа. ЮТЭ ба “Наша Украина” эвсэл нэгдэн “Ард түмний хүч” эвслийг байгуулан 2004 оны сонгуулиар Виктор Ющенког дэмжсэн билээ. Юлия Тимошенко 2004 оны сүүлчээр улбар шар хувьсгалын лидерүүдийн нэг болов. 2005 оны нэгдүгээр сараас дөрөвдүгээр сар хүртэл ерөнхий сайдын үүрэг гүйцэтгэж байгаад тэр жилийнхээ хоёрдугаар сард ерөнхий сайдаар томилогдсон ба парламент нь түүнийг есдүгээр сард тушаалаас нь огцруулжээ. ЮТЭ 2006 оны парламентын сонгуулиар 129 суудал аваад  улбар шар эвслийг сэргээх оролдлого нь бүтэлгүйтэж хатуу сөрөг хүчний байрт шилжсэн байна.

2007 оны ээлжит бус сонгуулиар ЮТЭ 30,71 хувийн санал авч ерөнхийлөгчийн “НУ-НС” эвсэлтэй парламентын олонх болоод 2007 оны сүүлчээр ерөнхий сайд болсон юм. Энэ жилийн эхээр  Юлия Тимошенко ерөнхийлөгчийн сонгуульд өрсөлдөн 45,47 хувийн санал авч өрсөлдөгч Виктор Януковичид  3,48 хувийн са­на­лаар ялагдсан билээ. 2010 оны гуравдугаар сард парламент нь Юлия Тимошенкогийн Засгийн газрыг огц­руулсан байна. Тимошенко үүний да­раа сөрөг хүчин болж буйгаа зарласан юм. Юлия Тимошенко 1997 онд “Агуу тарчлагч хувилгаан Варварагийн” одонгоор шагнагдсан байна. Нөхөртэй, насанд хүрсэн охинтой. Украин борщ, орос бин хийхдээ сайн гэж ярьдаг. Хамгийн дэгжин улстөрч эмэгтэйн жагсаалд тогтмол нэр нь ордог ба Америкийн Форбс сэтгүүл 2007 онд түүнийг дэлхийн хамгийн нөлөө бүхий эмэгтэйчүүдийн чан­сааныхаа гуравт нэрлэсэн байв.