УИХ-ын гишүүн Ц.Дашдорж уг нь өрөмдлөгийн инженер мэр­гэжилтэй. Энэ нь өмнөх дөрвөн жилд Барилга, хот байгуулалтын  дэд сайдын алба хашихад нь эгдүүцэхгүй байх шалтгаан болж аварсан гэж хэлж болно. Ганц гарын үсэг ч зурах мэдэлгүй энэ суудалд цалин хороосноос өөр гавьсан юмгүй. Тэгсэн хэрнээ Говь-Алтай руу шогшсоор байгаад оюутан залуусын тархийг угааж,  “Ирээдүйн Алтай” холбоо байгуулаад авсан. Түүнийхээ буянаар УИХ-ын ги­шүүн болж чадсан тэрбээр өөрийн мөнгөний уурхайн тухай буюу өөрөөр хэлбэл  “Монгол тамхи Co”-гийн захирал байснаа дурсах дургүй. Учир нь өөрийн болон өрсөлдөгч намынхандаа олон ний­тийг  тамхиар хордуулахаас өөр хий­сэн юмгүй      гэж гоочлуулдаг болохоор эмзэглэдэг биз ээ. Үнэндээ ч парламентад хоёр дахь удаагаа сууж байгаа гэхэд үг хэлсэн, үзэл бодол, байр сууриа илэрхийлсэн нь тун чамлалттай. Ямартаа л    тойргийн сонгогчид нь “Энэ суудлын      бөглөөс тамхичин Королияг огцруулж болдог ч болоосой” хэмээн хан­цуйдаа халаглаж, нударгандаа нуд­ралцаж байх вэ. Харин орон нутгийн удирдлагуудын талаар онцгой анхаарал тавьдаг, дажгүй хор­чин гэж нутгийнхан нь ярьдаг юм билээ. Эрхэм гишүүн өөрийн намтарт инженер, компанийн захирал, дэд сайд, УИХ-ын гишүүн гэсэн гоё албан тушаалуудаа үлдээгээд, алтны уурхай эзэмшигч, тамхи үйлдвэрлэгч гэсэн “Эвгүй карьер”-уудаа хасаад хаячихжээ. Гэвч “Сайн нэрийг хүсэвч олохгүй, муу нэрийг хусавч арилахгүй” гэдэг дээ.

Т.УРАНГЭРЭЛ