Ерөнхий боловсролын сургуулийн бага ангийн сурагчид замын хөдөлгөөнд оролцохдоо болгоомжгүйгээсээ болж гэмтэж, бэртэх тохиолдол сүүлийн үед их гарах болжээ. Тиймээс  Замын цагдаагийн газар, “Хүүхэд өсвөр үеийг ивээх төв”, “Монголын мянганы сорилтын сангийн Эрүүл мэндийн төсөл” хамтран “Анхаар би” төслийг хэрэгжүүлэхээр болсон байна. Энэхүү төслөөр авто замтай ойролцоох сургуулиудын бага ангийн хүүхдүүдийн цүнхэнд шөнө гэрэлтдэг уут хийж өгөх аж. Энэ ажлыг иргэд сайн, муу хоёр талаас нь хүлээж авч байна. Нэгдүгээрт, бага насны хүүхдүүд замын хөдөлгөөнд үдэш, орой оролцоход шөнө гэрэлтдэг цүнх тус болно гэж байгаа бол нөгөө талаар, энэ төсөл нь мөнгө идэх гэсэн нэг хэлбэр хэмээн үзэж байгаа юм. Тиймээс энэхүү төслийн эргэн тойронд сурвалжиллаа. 

Замын цагдаагийн газрын Олон нийттэй харилцах тасгийн байцаагч Цагдаагийн дэслэгч Б.Сүрэнжаваас уг төсөлд Замын цагдаагийн газар ямар үүрэгтэй оролцож байгаа талаар эхлээд лавласан юм.

-Замын цагдаагийн газар “Анхаар би” төсөлд хамтран оролцож байгаа гэсэн. Үүнийг зарим хүмүүс хөрөнгө мөнгөтэй холбож тайлбарлаж байна. Төсөлд хамтарсны төлөө санхүүжилт авч байгаа юм уу?

-Тийм зүйл огт байхгүй. Энэ төс­лийг “Монголын мянганы сорилтын сан”, “Хүүхэд өсвөр үеийг ивээх төв” хамт­ран хэрэгжүүлж байгаа. Бага насны хүүхдүүдийг авто замын ослоос сэргийлэх үйл ажиллагаа учир манайхтай хамтарч ажиллах санал тавихад нь хүлээж авсан. Хүүхдүүд замын хөдөлгөөнд аюулгүй оролцдог болох нь л бидний хувьд чухал. Харин санхүүжилтийн та­лаар мэдэх юм алга. Тэгээд ч Замын цаг­даагийн газрын дарга, Нийслэлийн бо­ловсролын газрын дарга нар хамтран Ерөнхий боловсролын сургуулийн сурагч­дад Замын хөдөлгөөний дүрмийн хи­чээл оруулах тушаал гаргаад байгаа.

-Цүнхний уут өгөх сургуулийг сонгоход Замын цагдаагийн газар ямар үүрэгтэй оролцсон бэ?

-Авто замтай ойролцоо байдаг сургуулийн хүүхдүүд осолд өртөх нь их байдаг судалгаа бий. Энэхүү судалгааг танилцуулсан.Үүний дагуу ерөнхий боловсролын гурав, тав, 34, 76 дугаар сургуулийн 4000 гаруй хүүхдийн цүнхийг шөнө гэрэлтдэг уутаар хангахаар болсон юм билээ.

Уг төлийг Монголын мянганы сорил­тын сангаас санхүүжүүлж байгаа учир тус сангийн Эрүүл мэндийн төслийн Эрүүл мэндийг дэмжих асуудал хариуцсан мэр­гэ­жилтэн Ц.Ундармаагаас мэдээлэл авлаа.

-“Анхаар би” төсөлд хэдэн төгрө­гийн санхүүжилт хийсэн бэ?

-Монголын мянганы сорилтын сан­гийн Эрүүл мэндийн төслөөс “Халдварт бус өвчин, осол гэмтлээс сэргийлэх” сэдвийн дор тэтгэлэгт хөтөлбөрийн уралдаан зарладаг юм. Уг уралдаанд хувь хүн, албан байгууллагын төлөөлөл оролцож болно. Энэ хүрээнд манай төслөөс гурван сая гаруй ам.долларын санхүүжилт төлөвлөсөн байгаа. Энэ тэтгэлэгт хөтөлбөрийн хүрээнд “Хүүхэд өсвөр үеийг ивээх төв” “Анхаар би” гэсэн төсөл бичиж ирсэн нь шалгарсан юм. Энэхүү төсөлд нийт 10 мянган ам.доллар шаардлагатай байсан. Уг хөрөнгийг нь гар­гаж өгсөн байгаа.

-Энэхүү төсөлд хэр шалгуур тавьсан юм бэ. Хүмүүс ярихдаа дахиад мөнгө татах арга гэж шүүмжилж байна?

-Уг төсөл осол гэмтлээс сэргийлэхэд маш өргөн хүрээг хамарч байгаа. Хүүхдүүд цүнхэндээ шөнө гэрэлтдэг уут зүүхээс цааргалах тухай яриа гарсан. Мөн мөнгөөр шахах нь гэсэн цуу ч байгаа юм билээ. Гэхдээ энэ уутыг төслийн шуга­маар үнэгүй тараана. Хүүхдүүд цүнхэндээ уут зүүхгүй гэдэг асуудлыг шийдэхийн тулд тэдний эцэг эхчүүд болон багш нарыг ч сургалтад хамруулж байгаа. Мөн жолооч нарыг хамарч чадаж байгаагаараа энэ төсөл өргөн хүрээтэй болж байгаа. Энэ цүнхний уутыг хүүхдүүдэд үүрүүлж хэвшвэл наад зах нь жолооч нарт орой үдэш замын хөдөлгөөнд оролцоход нь дөхөм болно. Санхүүжилтэд сургалт болон уутны зардлыг бүгдийг нь шингээсэн. Уутны загварыг бидэнд танилцуулсан. “Анхаар би”  гэсэн бичиг бүхий шөнө гэрэлтдэг уут байсан. Загвараа батлуулсан болохоор энэ сардаа багтаагаад сонгогдсон сургуулиудын бага ангийнханд тарааж эхлэх байх.

Р.САРАНГОО