Юуны өмнө Улсын мэргэжлийн хяналтын ерөнхий газрын даргын суудал сул байгаа. Энэ суудалд тус газрын даргын үүрэг гүйцэтгэгчээр ажиллаж буй дэд дарга Д.Ганбат хамгийн өндөр магадлалтай байна. Татаас ч сайтай юм. Учир нь түүнийг Ардын нам дахь “Хотын фракци”-аас гаралтай буюу М.Энхболд, Т.Бадамжунай нарын ивээлд байдаг гэлцдэг. Мөн Монголын хөрөнгийн биржийн захирал Р.Содхүү, Жижиг дунд үйлдвэрийн газрын дарга Ц.Ням-Осор нарыг дараагийн хувилбар хэмээн “нөөцлөөд” байгаа ажээ.
Мөн Газрын харилцаа, барилга, геодези, зураг зүйн газрын даргын суудал сул буй. Тус газрын даргаар ажиллаж байсан доктор Ш.Батсүх уг нь сэтгэлзүйч мэргэжилтэй юм билээ. Гэтэл тухайн ажлын байрны тодорхойлолтод инженер байх шаардлагатай гэсэн захиалгатай байдаг. Үүнээс болж удтал сунжирсан маргаан одоогоор хяналтын шатны шүүх дээр үргэлжилж буй. Энэ суудалд Татварын ерөнхий газрын даргаар ажиллаж буй Ц.Оюунбаатарыг томилох сураг дуулдаж эхэллээ. Ардын намын “жигүүр”-ийн гишүүн байснаар нь хүмүүс анддаггүй энэ эрхэм төрийн алба хашихдаа намаасаа түдгэлзсэн. Гэвч нам нь түүнээс нүүр буруулсангүй. Харин ч үнэ цэнэтэй суудалдаа өргөн дэвшүүлэхээр ярьцгааж байна. Нөгөөтэйгүүр тэрбээр Татварын ерөнхий газрын даргаар ажиллаж байгаа нь хууль зөрчсөн үйлдэл гэсэн хэл ам дагасаар байгаа. Учир нь Төрийн албаны хуульд заасны дагуу Засгийн газраас захиалсан ажлын байрны тодорхойлолтод заасан шаардлагыг хангаж чадаагүй дарга гэсэн. Түүний оронд хэн Татварын ерөнхий газрын дарга болох бол? Анхаарал татсан энэ асуултын хариуг УИХ-ын 2008 оны сонгуульд өвдөг шороодсон Гаалийн ерөнхий газрын дарга асан Д.Баттөмөр халаасалчихаад мишээж явна. Сүүлийн үед эдийн засгийн сэдвээр туурвил бүтээлээр арвин яваа түүний улс төрд тод харагдах хүсэл эрмэлзэл огтхон ч бөхөөгүй ажээ. Замын-Үүдийн гаалиар хууль бусаар орж ирсэн спиртээс болж балрах дөхсөн гунигт мөч ард үлдэж, улс төрд идэвхийлэн, урагшаа харж амьдрахаар шийдсэн бололтой.
Дараагийн “гоё сандал” нь Сангийн яамны саарал байрны ¹233 өрөөний хойморт бий. Энэ сандал дээр суух азтанаар Ерөнхий сайдын эдийн засгийн бодлогын зөвлөх Н.Энхбаяр, мөн Ерөнхий сайдын эдийн засгийн бодлогын орон тооны бус зөвлөх, “Тэнгэр” санхүүгийн нэгдлийн гүйцэтгэх захирал Ч.Ганхуяг, Сангийн яамны төсвийн бодлого, зохицуулалтын газрын дарга Б.Батжаргал нарын нэг нь тодрох юм. Мөн Стандартчилал, хэмжилзүйн газрын дарга, Иргэний нисэхийн ерөнхий газрын даргын асуудал эргэлзээтэй байгаа. Өөрөөр хэлбэл дээрх газруудыг үүрэг гүйцэтгэгч нь удирдаж байгаа гэсэн үг. БСШУЯ-ны харъяа Соёл урлагийн газрын даргыг ч ажлын байрны тодорхойлолтод нийцэхгүй байгаа талаар мэдээлэл гарч байсан. Дээрх асуудлаар Төрийн албаны зөвлөлөөс Засгийн газарт захиалгаа дахин өгөхийг хүссэн шаардлага хүргүүлж байсан ч одоо хүртэл хариу өгөөгүй байна.
Агентлагийн дарга томилох шиг амархан, бас сонирхолтой үйл явдал байхгүй биз. Харин эдгээр томилгоо нь төрийн албаны хууль тогтоомжид хэр нийцдэг талаар анхаарах хүн ховор байгаа нь харамсалтай. Тухайлбал агентлагийн даргыг Төрийн албаны зөвлөлийн сонгон шалгаруулалтад оруулж шалгаруулаад, ажлын байрны тодорхойлолтод нийцсэн бол салбарын сайд нь Засгийн газрын хуралдаанаар хэлэлцүүлж, Засгийн газрын тогтоолоор томилох учиртай. Сайд, дэд сайдыг улс төрийн томилгоогоор томилдог ч агентлагийн даргад зайлшгүй мэргэжлийн хүн байх шаардлагатай байдаг. Төрийн албаны зөвлөлийн сонгон шалгаруулалтад өндөр оноо авсан зарим хүмүүс ажилдаа орж чадаагүй талаар гомдолтой явдаг юм билээ. Нөгөөтэйгүүр Засгийн газар ажлын байрны захиалга өгөхдөө улс төрийн томилгоогоор санал болгох гээд байгаа хүмүүстээ тохирсон ажлын байрны тодорхойлолт бэлтгэж өгсөн нь бий. Энэ тохиолдолд сонгон шалгаруулалтад өндөр оноо авсан боловч төрийн албанд төдөн жил үр бүтээлтэй ажилласан байх гэх зэрэг шаардлагад нь тохироогүйгээс болоод өрсөлдөгчдөдөө ажлын байраа алддаг ажээ.
Ийнхүү “Хоёрдугаар ээлжийнхэн хоолондоо” орох цаг иржээ. Төрийн алба хаших та бүхний ашиг сонирхлын өмнө төрийн хууль бий. Түүнийг ягштал биелүүлэхээс ажлаа эхлэх үүргээ бүү мартаарай.
Зохиогчийн эрх:
"Улс төрийн тойм" сонин