Сангийн дэд сайд Т.Очирхүү УБТЗ-ыг толгойлохоор болж түүний суудал эзгүйрээд багагүй хугацаа өнгөрлөө. Түүний оронд хэн очих талаар мэр сэр яриа гарч байгаа бөгөөд хамгийн “шанстай” хүнээр Сангийн яамны Төсвийн бодлого зохицуулалтын газрын дарга Б.Батжаргал тодроод буй гэнэ. Тэрбээр албан тушаал ахиж, сүйд болдоггүй ч мэдлэг, мэргэжлээрээ яамандаа толгой цохидог, чуулганы хуралдаанд салбараа төлөөлөхдөө хэний ч асуултад бүдрээд байдаггүй нэгэн гэнэ лээ. Түүний хажуугаар тус яамны Нягтлан бодох бүртгэлийн газрын дарга Ж.Үхэртарын нэр ч яригдаж байгаа сурагтай.

Энэ хоёр эрхэм хоёулаа хөрөнгө орлогоо буруу мэдүүлсэн “хэргээр” АТГ-т шалгагдаж байсан ч салбарынхан нь энэ хоёрын нэг нь дэд сайдын суудалд сууна хэмээн тооцоолж, жиг жуг гэцгээж байна. Сангийн сайд нь АН-ынх болохоор дэд сайд нь МАН-ынх байх учиртай тохироо хэрэв үнэн бол Б.Батжаргалыг дэд сайд болоход хэн ч гайхахгүй биз ээ. Үүнтэй зэрэгцээд Мэргэжлийн хяналтын ерөнхий газрын дарга Я.Содбаатарын оронд хэн очих бол гэдэг олны сонирхол татаад буй.

Я.Содбаатарын хувьд МАН-ын хуучин кадр. МХЕГ-ын даргаар очихдоо намаасаа гарсан ч одоо эргээд МАН-ын орон тооны нарийн бичгийн дарга болчихож байгаа болохоор албан тушаалаа өгөх нь зүйн хэрэг. Багагүй шанстай түүний  хуучин суудалд өнөөдөр яг тэр очно гэсэн яриа тохироо хийгдээгүй ч эх сурвалжийн мэдээлснээр Хөрөнгийн биржийн захирал Р.Содхүү хамгийн өндөр магадлалтай хүнээр  тодроод байгаа аж.

Хөрөнгийн биржийг “нураасан” ялтай түүнийг дэвшүүлэн зайлуулахаар шийдэх нь тийм ч тааж ядаад байх оньсого биш. Ялангуяа түүний орны хүнийг нь олчихоод тохоон томилох нь өнөө маргаашгүй болчихоод байгаа гэх яриа байна. Хөрөнгийн биржийг “Хас”-ын гэгддэг, саяхан МАН-д шургалсан Ч.Ганхуяг толгойлж магадгүй гэсэн яриа хэдийнэ газар авсан нь үүнийг баталж буй. Хуучнаар Хувьсгалт намынхны энэ мэт сандал суудлын тохироог хийдэг, гардан зохион байгуулагч нь өнөөх л У.Хүрэлсүхийг гэх. Наагуураа мэр сэр тохиролцсон гэх ч цаанаа МАН-ын генсекийн хошуу, гар хоёр заавал хөдөлсөн байдаг нь нууц биш ээ.

Б.ОЮУ