УИХ-ын гишүүн С.Эрдэнэ УИХ-ын даргад хандсан байна. Өөрийг нь УИХ-ын гишүүн, Ардчилсан намын дарга Н.Алтанхуяг тагнаж чагнасан хэмээн тэрбээр ийнхүү спикерт ханджээ. Ардчилсан намын ҮЗХ-ны хурлын үеэр Н.Алтанхуяг дарга С.Эрдэнэ гишүүнийг “Чи намын эсрэг үйл ажиллагаа явууллаа. Чиний ард экс Ерөнхийлөгч Н.Энхбаяр байгааг мэдэж байна. Та хоёр есөн удаа уулзсан” гэхчлэн загнаж, мөн дараа нь болсон УИХ дахь Ардчилсан намын бүлгийн хуралдаан дээр Н.Батбаяр, С.Эрдэнэ нартай тар тур хийн эд зүйлс шидэлж бужигнуулсан нь тэдний хооронд харилцаа таагүй болсны шинж гэж бүлгийн гишүүд нь хэлж байна.

УИХ-ын дарга тагнасан чагнасан гэх уг асуудлыг Ёс зүйн дэд хороонд шилжүүлэх гэсэн боловч С.Эрдэнэ гишүүн харьяаллын дагуу Тусгай хяналтын дэд хороонд шилжүүлж өгөхийг хүсчээ. Ийнхүү Э.Мөнх-Очир даргатай Тусгай хяналтын дэд хороо уг асуудлыг хэлэлцэхээр болж буй аж.

Тагнасан чагнасан гэх асуудлаас үүдэн МАН-ын бүлгийн гишүүд Ардчилсан намын гишүүдтэй  утсаар ярих бус өрөөнд нь орж уулзаж байя хэмээн хошигнох болжээ.