![](https://news.mn/wp-content/archive1/local/photo/2010/10/aa79b3cc536afaa1/f08cdd20bc6fa4d8big.gif)
Таван толгойн нүүрсний уурхайгаас Өмнөговь аймгийн Ханбогд сумын нутаг Гашуун Сухайтын хил хүртэлх замаар өдөр шөнөгүй том машинууд нүүрс тээвэрлэж,тэр хэрээрээ зам тээврийн осол их гардаг цэг болсон байна. Хүнд даацын машин мөргөлдөхөд дотор нь сууж явсан хүн амьд үлдэх магадлал маш бага байдаг учир ЗЦГ-аас уг газарт хэд хэдэн хэсэг гарган ажиллуулж байгаа юм. Цагдаагийнхан тэнд ажилласнаас хойш осол гараагүй байгаа нь үр дүнгээ өгөхүйц арга хэмжээ болж байна. 250 км урттай дээрх замд энэ оны эхний долоон сарын байдлаар найман хүн нас барсан нь өнгөрсөн оныхоос хэд дахин их байгаа үзүүлэлт ажээ. Харин цагдаагийнхан ажиллаж эхэлсэн наймдугаар сарын долооноос хойш хүний амь эрсдээгүй. Жолооны үнэмлэхгүйгээр тээврийн хэрэгсэл жолоодох, ангилал таарахгүй машин барих, хурд хэтрүүлэх, дүрэм зөрчих, техникийн бүрэн бүтэн байдлыг хангахгүйгээр хөдөлгөөнд оролцох зэрэг ноцтой зөрчлүүд уг зам дээр байнга гардаг гэнэ. Ихэвчлэн 75-120 тоннын даацтай машинууд дээрх замаар явдаг атал замын нөхцөл муугаас эвдрэл гарах нь их. Сөрөг урсгалтай ганц замтай. Нэг талаасаа ачаатай том машин явж байхад нөгөө талд нь машин эвдрээд зогссон байна. Тэр хавийн тоос шороо ч осол гарах нэг хүчин зүйл болдог гэдгийг замын цагдаагийнхан хэлж байна. Оны эхний есөн сарын байдлаар энэ замд арван том осол болсон, хохирол маш их гардаг, хүний амь үрэгддэг байсан бол цагдаагийн албан хаагчид ажилласнаар байдал дээрдсэн гэдгийг иргэд ярьж байна. Өмнөговь аймгийн Цогтцэций суманд үйл ажиллагаа явуулж буй нүүрсний компаниуд гэрээгээр найман албан хаагч ажиллуулсны хоёр нь Өмнөговь аймгийн иргэн бусад нь Улаанбаатар хотоос очсон албан хаагчид ажээ.