Хойд Солонгосын удирдагч Ким Чен Ир /Ким Жонг Ил / өөрийн хүү Жонг Унтайгаа Өмнөд Солонгосын арал руу гал нээсэн их бууны баазад гал нээхээс хэдхэн цагийн өмнө очсон гэж Өмнөд Солонгосын хэвлэл мэдээллийн байгууллага өнөөдөр мэдээллээ. Өөрөөр хэлбэл, гал нээх тушаалыг Ким Чен Ир өөрөө өгсөн байх магадлал өндөр байгаа юм. Энэ талаар Засгийн газрын эх сурвалжаас “Joongang Daily” байгууллага мэдээлэл авсан гэж бичсэн байв. Харин “Reuters” агентлагийн зүгээс Өмнөд Солонгосын Засгийн газартай холбогдоход энэ тал дээр тодорхой хариулт өгөөгүй байна.

Мэдээллээс харахад, Ким Чен Ир өөрийн хүүгийн хамт Өмнөд Хванхаэ мужид байрлах дөрөвдүгээр дивизийн ахлагч, Генерал Ким Кёк Сиктэй гал нээхийн өмнөхөн уулзсан гэжээ. Үндэсний аюулгүй байдлын холбооны гишүүний хэлснээр энэ мэдээллийг хүлээж авсан ба энэ нь дайралттай шууд холбоотой эсэхийг нягталж байгаа аж.

Э.Очирт