Мягмар гаригт Хойд Солонгосын талаас Ёнпёнг арал руу их буугаар галлаж, дөрвөн хүний амийг хөнөөсөн юм. Үүний шалтгаан нь Өмнөд Солонгосын зүгээс Шар тэнгисийн орчим цэргийн бэлтгэл хийсэн явдал юм. Удалгүй хоёр тал байлдааны бэлэн байдал зарласан билээ.

Харин хоёр Солонгосын хурцадмал байдалд БНХАУ ямар хариу өгөх вэ гэдэг асуултын хариулт хамгийн ихээр хүлээгдэж байна.

Хятад улс бол БНАСАУ-ын холбоотон төдийгүй худалдааны хамгийн том түнш юм. Хятадын хувьд Хойд Солонгосын гадаад ертөнцтэй холбогдох хамгийн гол суваг бөгөөд хүнс, шатахуун болон зэвсэгийн нийлүүлэлтийг зогсоож, хүчтэй хохирол учруулах чадалтай. Гэхдээ одоогоор ийм алхам хийх шинж илрээгүй байгаа юм. Тус улсын хувьд аливаа орны дотоодын асуудалд хутгалдахгүй гэсэн бодлого баримталдаг тул БНАСАУ мэт холбоотон оронд төдийлөн туслахгүй болов уу? Гэхдээ Бээжингийн зүгээс тус улсыг хэлэлцээрийн ширээний ард суулгахаар оролдож байна.

Эдийн засгийн туслалцаа, улс төрийн харилцан буулт амлаж, хариуд нь цөмийн зэвсгийн хөтөлбөрөө зогсоохыг ятгах зорилготой зургаан талт хэлэлцээрийн хамгийн сүүлийн уулзалтад Хойд Солонгосын тал оролцоогүй билээ. Одоогийн байдлаар энэ хэлэлцээр гурван жилийн турш амжилт олоогүй байна. Шинжээчдийн үзэж буйгаар Солонгосын хойг дахь хурцадмал байдлыг яаралтай намжаах хэрэгтэй гэж байгаа ба үүний нэг нь зургаан талт хэлэлцээрийг хийх явдал аж.

Хойд Солонгос тэгвэл яг юу хүсч байгаа вэ? “Тэдний олон жилийн турш хүсч байгаа ганц зүйл нь АНУ Хойд Солонгосыг дипломат замаар хүлээн зөвшөөрөх” гэж Альбертагийн их сургуулийн улс төр судлалын профессор Венран Жианг хэлэв.

Хэдийгээр зургаан талт хэлэлцээр амжилтгүй байгаа нь илт байгаа ч Бээжин нь Пхеньяныг хэлэлцээрийн ширээнд дуудах хамгийн боломжтой хүчин гэж олон шинжээч үздэг. Дэлхийн хэмжээнд хүчээ авч буй БНХАУ л ганцаараа хурцадмал байдлыг зөөллөж, энхийг сахиулагч байх талтай байна.

Гэхдээ Хятадын нөлөө их ч энэ нөлөөлөл нь абсолют биш гэдгийг санах хэрэгтэй.

Э.Очирт