Энэ япончууд нийгмийн хөгжлөөрөө манай оронтой харьцуулвал талийж өгсөн  улс. Харин улс төрийн соёлоороо бол манайхаас үнэхээр хоцрогдсон гэдэг нь харагдаж байна. Өчигдөрхөн Японы хууль зүйн сайд Минору Янагида “Хууль зүйн сайдын ажил их амархан. Ердөө хоёр дүрэм цээжлээд л болоо.” гэж хошигносныхоо төлөө ажлаа өгч танхи­маа орхив. Зургаан сарын өм­нө тус улсын Ерөнхий сайд Ю.Хатояма эрх барих найман сарынхаа хуга­цаанд амласан амлалтаа хэ­рэг­жүүлж чадаагүй гээд үүрэгт ажлаа өгч байлаа. Энэ япончууд шударга зан­гаасаа болж онигоо болж байна аа, үнэндээ. Амласан амлалт, хэл­сэн үгээсээ болоод огцроод байх юм. Тэгээд тэр нь сүртэй том зүйл бол хамаа алга. Гэтэл жижиг асуудлаас болоод л хийж байгаа ажлаа орхиод байх юм. Зүгээр л гүрийх хэрэгтэй шүү дээ. Манай улсын төрийн өндөр албан тушаалтнуудаас санаа авах хэ­­рэг­тэй. Хариуцлага алдах бай­­тугай хэчнээн хүний амь амьдралыг үгүй хийсэн хүн УИХ-ын гишүүн гээд хадаатай байж л байна. Амласан ам­лалтаа хэрэгжүүлж чадаагүй хэрнээ ирэх сонгуульдаа бэлт­гээд эхэлчихсэн эрхмүүд ч манай парламентаар дүүрэн байна. Гэтэл тэд нар яав. “Мулгуу” юм шиг огцроод байх юм. Яасан шударга улс вэ. Жаахан өөр байж болдоггүй юм байх даа. Манай томчууд амь зуулгаа боддог болохоос ард түмнээ боддоггүй юм. Гэтэл та нар үр хүүхэд, гэр бүл, хамаатан саднаа бодохгүй ард түмнээ бодоод байх юм. Яасан сонин хүмүүжил вэ. Гүрийж, гүрдийж, улайж, хар хүрэнтсэн ч суудалдаа сууж байх ухааныг эцэг эх нь зааж өгөөгүй л юм байх даа. Аягүй бол цэцэрлэгт байхдаа сандал, суудалдаа хэрхэн сайн сууж сурахыг заалгаагүй байх аа. Гудамжаар явах­даа ард түмний амьдрал руу биш хөх тэнгэрлүү ширтээстэй чигээрээ алхаж сурах шаард­лагатай. Дараа нь өндөр албан тушаалд сууж сурна. Монголын улс төрчдөөс суралц. Япончууд аа.

Б.ЭНХМӨНХ