Италийн Сери А лигийн хүрээнд өнгөрсөн ням гаригт “Кьево”-той хийсэн тоглолтын үеэр “Интер Милан”-ы довтлогч Самуэль Эту эсрэг багийн хамгаалагч Бостьян Сезарийн цээж рүү толгойгоороо мөргөж, талбай дээр бүдүүлэг авир гаргасныхаа төлөө шийтгэл хүлээжээ. “Кьево”-гийн талбайд өрнөсөн тоглолтод “Интер” 2:1-ээр ялагдал хүлээсэн бөгөөд багийнхаа цорын ганц гоолыг оруулсан Эту тоглолтын 38 дахь минутад Сезарь руу дайрч, цээж рүү нь хүчтэй мөргөсөн аж. Тухайн үед шүүгч түүний үйлдлийг анзаараагүй учир ямар нэг шийтгэл хүлээгээгүй юм.

Харин хожим нь Италийн хөлбөмбөгийн холбоо хуралдаж, тоглолтын видео бичлэгт үндэслэн Этуг Сери А лигийн гурван тоглолтыг өнжих шийдвэр гаргасан байна. Түүнчлэн Камерун довтлогч 30 мянган еврогийн торгууль хүлээжээ. Гэхдээ тэрбээр энэ үдэш Аваргуудын лигийн хүрээнд Голландын “Твенте” клубтэй хийх тоглолтод оролцох эрхтэй юм.

Дашрамд сонирхуулахад, Италийн Сери А лиг энэ улирлаас эхлэн тоглолтын бичлэг ашиглаж, шийдвэр гаргах дүрэм гаргасан бөгөөд энэ дүрмийн эхний шийтгүүлэгч нь Жилардиньо юм. “Фиорентина”-гийн довтлогчийг гараараа гоол хийсэн гэж үзэн хоёр тоглолтоор шийтгэсэн билээ. 

С.Цэлмэг