Испанийн эзэн хааны “Реал Мадрид” клубын менежер Жозе Моуриньо ирэх оны эхний өдөр нээгдэх солилцооны цонхоор ямар нэг довтлох чиглэлийн тоглогч авах шаардлагагүй гэж хэлсэн байна. Түүний үзэж буйгаар Кака гэмтлээсээ эргэн ирэх нь тэдэнд чухал гэжээ. Дэлхийн шилдэг хөлбөмбөгч Бразил хагас хамгаалагч Кака наймдугаар сард өвдгөндөө мэс засал хийлгэсэн учраас өдийг хүртэл талбайд гараагүй байгаа билээ. Түүнийг эзгүйд “Реал”-ын залуус сайн тоглож байгаа бөгөөд түүнийг ирэх өвөл буцаад “Милан” эсвэл “Интер” рүү явна хэмээн Испани, Италийн хэвлэлүүдээр цуурхаж байсан юм. Гэсэн ч “Онцгой нэгэн” үүнээс эсрэг бодолтой байгаа бололтой.
“Ирэх өвөл бидний хийх хамгийн том гэрээ Какагийнх байх болно. Тэр эргэн ирж, бидний тоглолтыг илүү хүчрхэгжүүлнэ. Тиймээс түүнийг явуулах бодолгүй байна” гэж Португаль мэргэжилтэн хэлжээ.

Мөн Моуриньо Франц довтлогч Карим Бенземаг ирэх өвөл багаа орхино гэсэн ярианд “Карим яаж тоглох тал дээр өөрийгөө сайн ойлгохгүй байгаа. Тэр багийн тоглолт үзүүлдэг сайн тоглогч болохын тулд шаргуу бэлтгэх хэрэгтэй. Миний хүсч байгаа зүйлийг сайн ойлгож, хичээж байгаад нь би баяртай байгаа. Тэр илүү өндөр төвшинд тоглож чадна. Түүнээс илүү ихийг хүлээдэг. Анх түүнийг Лионд байхыг нь хараад л авьяастай сайн тоглогч гэж бодсон. Тэр үнэхээр авьяаслаг, тиймээс түүнийг түлхэх шалтгаан надад байхгүй” гэсэн хариу өгчээ.