ҮАБЗ-ийн Ажлын албаны дарга Б.Хурцад холбогдох шүүх хурал ирэх оны нэг­дүгээр сарын 5-нд болно. Их Британийн Хитроу нисэх онгоцны буудлаас есдүгээр сарын 17-ны өдөр тусгай албаныханд баривчилагдсан Б.Хурцын шүүх энэ сарын 15-ны өдөр “Court of Magistrate of Westminster” шүүх танхимд болж  ийн хойшлогдсон юм.

Шүүх хуралд Гадаад харилцааны яамны Төрийн нарийн бичгийн дарга Д.Цогтбаатар, Хууль зүй, до­тоод хэргийн яамны Төрийн нарийн бичгийн дарга Г.Баясгалан, Тусгай үүрэг гүй­цэтгэгч Ц.Болор, Монгол Улсаас тус улсад суугаа Онц бөгөөд бүрэн эрхт Элчин сайд Б.Алтангэрэл, ЭСЯ-ны Зөвлөх Н.Батаа нар Монголын талыг төлөөлж оролцсон талаар өмнө мэдээлсэн. Уг шүүх хуралд Их Британийн Өмгөөлөгчийн холбооны гишүүн Мак Доналтс өм­гөөлөл явуулах тухай мэ­дээл­лийг  өмнө нь Гадаад харил­цааны яамнаас өгч байв.Харин Б.Хурцад холбогдох дөрөв дахь шүүх хурлын үеэр  Мак Доналтсын  төлөөлөгч Алан Жонс оролцсон байна. Манай улсаас  дипломат хал­дашгүй эрхтэй ажилтнаа сул­лахад анхаарч ажлын хэсэг байгуулагдан ажиллаж буй.  Уг ажлын хэсгийг ахалж буй  ГХЯ-ны дэд сайд Б.Болортой  уулзаж ярилцлаа.

-Энэ сард манай ажлын хэсгийнхэн   Лондонд очих­доо  Б.Хурцтай нүүр тулж уулзсан уу. Биеийн байдал нь ямар байна вэ?

-Энэ сарын15-ны өдөр Лондонд болсон шүүх хур­лын үеэр манай ажлын хэсгийн гишүүн ГХЯ-ны Тө­рийн нарийн бичгийн дарга Д.Цогтбаатар  Б.Хурцтай уулз­сан. Биеийн байдал нь хэвийн байгаа гэсэн.Нөхцөл байдал нь гайгүй.

-Өнгөрсөн шүүх хуралд гэр бүлийнхэн нь оролцсон уу?

-Гэр бүлийнхэн нь оролцож амжсангүй. Дараагийн шүүх хурлаас өмнө эхнэр, хүүхдийг нь явуулах талаар анхаарч байна. Одоогоор Английн Эл­чин сайдын яаманд урт хуга­цааны виз хүссэн. Виз олгох ажил удааширч байна.

– Түүнийг  батлан даалтад гаргах боломж бий юу?

-Хэрэв эхнэр хүүхэд нь Англи Улсад  түр хугацаагаар оршин суухаар очвол  бат­лан даалтад гаргах  талтай гэж үзэж байгаа юм билээ.

-Шүүх хурал хойшлох бол­сон үндэслэлийн талаар тодорхой тайлбар өгөхгүй юу?

-Дипломат халдашгүй  эрхтэй Б.Хурцыг Германы талд шил­жүүлэн өгөхгүй байх олон улсын эрх зүйн тодорхой үндэслэлээр тайлбар гаргасан бөгөөд  хурал даргалагч шүүгч тэдгээр үндэслэлийг нарийвч­лан авч үзэх  нь  зүйтэй гэсэн шийдвэр гарч хойшилсон.

-Ажлын хэсэг байгуу­лагдаж багагүй хугацаа өн­гөр­сөн. Та бүхний ажлын үр дүн?

-Их Британийн тал Монгол Улсын дипломат халдашгүй эрхтэй албан тушаалтныг барив­чилсан   үйл ажиллагаа нь  хууль зөрчсөн үйлдэл гэж бид үзэж байгаа. Тийм учраас иргэнээ Монголд авчрах тал дээр хүчин чармайлт гарган ажиллаж байна. Тухайлбал,  манай улсын ир­гэн­тэй холбоотой асуудлыг Английн хуулиар 21 хоногийн дотор шийдэх  ёстой. Гэтэл өнөөдрийг хүртэл Германы талд шилжүүлээгүй нь  аж­лын хэсэг байгуулагдаж ажил­ласнаар тодорхой үр дүн гарч байна гэж ойлгож болно.  Манайхан Б.Хурц гэдэг  хувь хүний нэрийг гаргахаас илүү Монгол Улсын иргэнийнх нь хувьд авч  үзэх хэрэгтэй байна.Тэр  хүн тодорхой албан тушаал хашиж явсан,  дипломат халдашгүй эрхтэй албан тушаалтан. Тиймээс бид иргэнээ  эх орондоо буцаан авчрах  асуудалд анхаарах хэрэгтэй.

-Ажлын хэсэгт ямар хү­мүүс орсон бэ?

– Хуульзүй дотоод хэргийн яам, Тагнуулын ерөнхий газар, Үндэсний аюулгүй байдлын зөвлөл, Гадаад  харилцааны яамнаас төлөөлөл оролцсон.

-Ирэх онд болох шүүх хуралд ямар хүмүүс оролцох вэ?

-Одоогоор тодорхойгүй байна.

– Б.Хурцын бэлтгэл шүүх хурал удахгүй болно гэсэн мэдээлэл байна л даа. Энэ ямар учиртай юм бэ?

-Бэлтгэл шүүх хурал гэдэг нь баримтуудаа цуглуулж  урьд­чилан харилцан ярилцдаг юм байна лээ. Яллагч талаас “Танай асуудал  зөв байна” гэж үзвэл хэргийг татах нөхцөл бас байж болох юм билээ. Гэхдээ үүнийг урьдчилж ярих боломжгүй.

– Их Британи Улс саяхан Элчин сайдаа татсан. Энэ үйлдлийг Б.Хурцтай хол­босон тайлбар нэлээд гарсан л даа?

-Монгол Улсаас албан ёсоор Элчин сайдаа татах болсон  ноот бичигт  дотоод ажлын шалтгаантай гэж дурд­сан. Харин  тус улсаас Б.Хурцын асуудалтай хол­богдуулж Элчин сайдаа татсан гэсэн албан ёсоор мэдэгдсэн зүйлгүй. Ойрын хугацаанд Элчин сайдаа томилох тухай мэдээлэл ирсэн гэсэн. Ер нь Их Британи  Элчин сайдаа татсан нь манай улстай сөргөлдөж байна гэж ойлгож болохгүй л дээ.