Үндэсний хөгжил шинэт­гэлийн хорооныхон энэ онд Монгол Улсын санхүү, эдийн засгийн байдал бүрэн тогт­воржсон хэмээн дүгнэж байгаа аж. Улмаар ирэх онд эдийн засаг эрчимтэй өсөх ханд­лагатай байна хэмээн өчигдөр болсон хурлын үеэр мэ­дээлсэн юм. Энэ жилийн хувьд инфляци төсөөлж байс­наас нэмэгдэж, 11.3 хувьд хүр­сэн. Үүний гол шалтгааныг он гарсаар олон тооны мал зу­дад хорогдож, махны үнэ нэ­мэгдсэн явдал хэмээн эдийн засагчид тайлбарлаж байна. Засгийн газраас энэ асуу­далд анхаарлаа хандуулан авах арга хэмжээг хэлэлцээд ма­хыг хүрэлцэхүйц хэм­жээ­гээр нөөцлөх, үр та­риа­­ны үйлдвэрлэлийг нэ­мэг­­дүүлэхийг онцолсон. Ин­­гэснээр ирэх онд хүнсний үнийн өсөлтийг хазаарлах бо­ломжтой болох гэнэ.

Аж үйлдвэрийн салбарын үйлд­вэрлэл нэмэгдсэнээр эдийн засгийн бодит өсөлт ирэх онд 8.2 хувьд хүрнэ хэ­мээн ҮХШХ-ыхон таамаг­ласан байна. Харин 2013 оноос уул уурхайн томоохон тө­сөл хөтөлбөрүүд хэрэгжиж эхэлснээр эдийн засгийн өсөлт 20.8 хувьд хүрнэ хэмээх тоо­цоог гаргаад байгаа юм байна. Мөн инфляцийн түв­шин 2011-2013 онд жилд 8.7-9.7 хувь буюу нэг оронтой тоонд байна хэмээн төсөөлж байгаа ажээ. Ирэх онуудад уул уурхайн томоохон орд газ­руудыг эргэлтэд оруулах, уул уурхайн бүтээгдэхүүнийг боловсруулах ажлууд чу­хал зорилт болгосон. Ул­маар томоохон төс­лийн хэ­рэгжилтийг эрчим­жүү­лэх хэрэгтэй байгаа. Ашигт малт­­малын ордуудын түү­хий эдийг эх орондоо бо­ловсруулан экс­портод гар­гахын тулд “Сайн­шанд” хүнд аж үйлдвэрийн цогцолбор барихаар шийд­вэрлэсэн. Уг цогцолбор ашиг­лалтад орсноор манай улсад уул уурхайн салбараас олох ор­лого үлэмж хэмжээгээр нэмэгдэнэ гэсэн тооцоо бий. Одоогийн байдлаар “Сайн­шанд” цогцолборыг бай­гуу­лах ажил цаасан дээр, судал­гааны шатандаа явж буй. ҮХШХ-ны Салбарын хөгжил, хө­рөнгө оруулалтын нэгдсэн бод­логын газрын дарга Б.Ган­баатар “Цогцолборыг бай­гуу­лахад олон төрлийн су­дал­гаа хэрэгтэй. Одоогийн байд­лаар уг төсөлд хамтарч ажил­лах гадаадын хоёр төр­лийн зөвлөхийг сонгон шал­га­руулах ажлыг хийж бай­гаа. Ингэснээр олон улсын турш­лагаас судлах, зөвлөгөө авах боломжтой болно” гэлээ.

Үндэсний хөгжил ши­нэт­гэлийн хорооны Хөгж­лийн бодлого, стратеги тө­лөв­лөл­тийн газрын дарга Г.Бат­хүрэ­лээс зарим асуултад хариулт авлаа.

-Ирэх жилд эдийн зас­гийн үзүүлэлт сайжирна хэ­мээн төсөөлж байгаа юм байна. Та бүхний төсөөлсөн үзүү­лэлт биелэх магадлал хэдэн хувьтай байна вэ?

-Төсөөлж байгаа тоон үзүү­лэлтүүд биелэх магадлал өндөр байгаа. Гэхдээ зарим хүчин зүйлээс болж инфляци нэмэгдэх эрсдэл гарч болно. Жишээ нь, ирэх онд “Хүний хөгжил сан”-аас иргэн бүрт бэлэн мөнгө олгоно.

-Монголбанкнаас ирэх жилийн төсвийн төслийг хэ­лэлцэж байгаатай хол­бог­дуулан “Энэ төсвийг ба­талбал ирэх онд инфляци 20 хувьд хүрнэ” хэмээн мэ­дээлсэн?

-Монголбанк мөнгөний ний­лүүлэлт ихсэнэ хэмээн үзсэний үндсэн дээр тэгж дүг­нэсэн байх. Ирэх онуудад аж үйлд­вэрийн салбарт өсөлт гарна. Засгийн газраас үнийг тогтвортой байлгахад анхаарч байгаа. Тиймээс инфляци нэг оронтой тоонд байх магадлал өндөр. 

Үндэсний хөгжил, шинэт­гэлийн хорооноос “Бизнесийн орчны шинэтгэлийн жил”-ийн төлөвлөгөөний биелэлт сайн байгаа хэмээн мэдээлж байгаа. Хууль, эрх зүйн хүрээнд за­рим шинэчлэлийг хийсний зэ­рэгцээ бизнес эрхлэхэд тул­гардаг шат дамжлагыг цөөлөх тал дээр арга хэмжээ авсан. Төлөвлөгөөний биелэлт сайн байгаа гэж хурлын үеэр хэл­сэн юм.  Харин хувийн хэвш­лийнхэн, ажил олгогчдын зүгээс төлөвлөгөөний биелэлт муу байгаа хэмээж байгаа билээ.

Б.Арвинбаяр: ТӨРИЙН ХИЙЖ БАЙСАН 15 ЧИГ ҮҮРГИЙГ ХУВИЙН ХЭВШИЛД ШИЛЖҮҮЛСЭН

Үндэсний хөгжил ши­нэт­гэлийн хорооны Хувийн хэв­шил, инновацийн бод­логын хэлтсийн дарга Б.Ар­вин­баяраас энэ талаар тод­рууллаа.

-Монголын үндэсний ху­далдаа аж үйлдвэрийн тан­химаас төр, хувийн хэвш­лийнхэн хамтарч ажиллана гэдэг асуудал цаасан дээр л хэ­рэгжиж байна гэж байна лээ?

-Засгийн газраас “Биз­несийн орчны шинэтгэлийн жил”-ийн төлөвлөгөөг боловс­руулахдаа хувийн хэвшил, ажил олгогчдын саналыг сонс­сон. МҮХАҮТ-ынхан МХЕГ, Татварын ерөнхий газар зэрэг холбогдох байгууллагуудаар орж шинэтгэлийн жилийн тө­лөвлөгөөг хэрхэн хэрэг­жүүлсэн талаар нь танилцаж болно. Төр, хувийн хэвшил хам­тарч ажиллаж байгаа. Шинэтгэлийн жилийн хүрээнд хийх зүйлс бол ганцхан жи­лийн дотор өрнүүлэх кампанит ажил биш. Ирэх онуудад үр­гэлжилнэ.

-Яг юун дээр хамтарч ажил­лаж байгаа юм бэ?

-Төрийн байгууллагын хэ­рэг­жүүлдэг 15 чиг үүргийг ху­вийн хэвшилд шилжүүлсэн байна.  Ер нь төрийн зарим чиг үүргийг хувийн хэвшилд шил­жүүлэхдээ “Үүнийг та нар хий” гээд л болчихдог юм биш. Судалгаа, шинжилгээ, төлөв­лөгөө хэрэгтэй.

Т.УРАНГЭРЭЛ

Зохиогчийн эрх:
 "Улс төрийн тойм" сонин