Засгийн газар өнгөрсөн лхагва гаригийн хуралдаанаар 254 компанийн лицензийг цуцлаад хаячихав. Юу болж байна вэ. Бараг 300 шахам аж ахуйн нэгж. Нэг компанид дунджаар 60-100 хүн ажилладаг гэж тооцвол 100 гаруй мянган хүн ажилгүй болох шийдвэр гарав. Төр, засаг төдий тооны татвар төлөгчдөө ийнхүү гаргуунд гаргахад юу нөлөөлөв гэдэг их сонин. Хуралдааны шийдвэрийг харвал Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай гэсэн, хоёр шахам жил тойрон ярьсаар ирсэн нөгөө урт айхтар нэртэй хуулиа амьдралд хэрэгжүүлж эхэлж байгаа нь энэ гэнэ.

Дээрх хуулийн дагуу гол, мөрөн, усны болон ойн эх сан газар үйл ажиллагаа явуулж буй уул уурхайн компаниудыг хөөв. Нэг ёсондоо ийм газарт үйл ажиллагаа эрхлэх лицензийг цуцлав. Үүнийгээ нөхөх олговор олгоно гэдгээр хаажээ. 254 компанид олгох нөхөн олговор гэдэг нэлээдгүй мөнгө болно. Тэрбум тэрбумаар зогсохгүй. Ийм хэмжээний мөнгө төсвөөс гарна гэсэн үг. Тэгвэл улсаас нэг удаа ийм хэмжээний мөнгө гаргахын оронд /100 мянгаад хүн ажилгүй, амьдралгүй болж байгааг тооцохоо байя гэхэд/ байнга орж ирэх татвараа бодоод уул уурхайн компаниудад ялгавартай хандалгүй, дэндүү хавтгайруулчихлаа гэсэн гомдол бизнес эрхлэгчдийн зүгээс гарч эхлэв. Учир нь “шинэ” хуулийн хүрээн дэх газруудад байгаль, орчноо бохирдуулаад байгаа нь бий ч бас ашигласан газар нутгаа нөхөн сэргээгээд жам ёсоороо яваа нь бас байгаа аж. Үүнийг ялгаж тогтоолгүй нийтэд нь авч үзэн хавтгайруулсанд үндэсний уул уурхайн компаниуд гомдолтой байна.