Монгол, Оросын хамтарсан Улаанбаатар төмөр зам нийгэмлэгийн хамгийн сүүлд худалдаж авсан будаг нь ханхалсан шинэхэн зүтгүүр эвдэрсэн гэх мэдээллийг Оросын төвийн хэвлэлүүд мэдээлснийг манай сонин мэдээлсэн.  Төмөр замд хуучин, муу техник хэрэгсэл шахах бизнес хийх сонирхол байдаг гэдэг. Тиймдээ ч Монголын нөхцөлд сайжруулж угсарсан гэх зүтгүүр нь эвдэрч эхэлсэн нь анхаарал татаж, энэхүү хардлагыг төрүүлж буй билээ. Энэ талаар тодруулахаар албаны эх сурвалжид хандсан ч хариу өгөөгүй талаар бид мягмар гаригийн дугаартаа мэдээлсэн. Харин Зүтгүүрийн депогийн дарга Н.Хуяг-Эрдэнэ Оросын “Газеты Ру”-д гарсан мэдээллийг эрс няцаасан байр сууриа илэрхийлсэн юм.

-Улаанбаатар төмөр зам “Трансмашхолдинг”-той байгуулсан гэрээний дагуу шинэ зүтгүүр авч эхэлж байгаа гэсэн үнэн үү?

-Бид бол ирснийг нь явуулдаг, эвдэрснийг нь засдаг хүмүүс шүү дээ. Яг ямар гэрээний дагуу зүтгүүр ирж байгааг мэдэхгүй. Юутай ч бид цоо шинэ зүтгүүртэй болсон нь үнэн. Харин энэ зүтгүүр эвдэрсэн тухай Оросын болон Монголын хэвлэлүүдэд бичсэнийг уншсан. Ийм зүйл огт байхгүй.

-Оросын хэвлэлд бичсэнээр 2ТЭ11УМ маркийн зүтгүүрийн подшипник цаг агаарын нөхцөл даалгүй эвдэрсэн гэж бичсэн байсан?

-Подшипник гэж төмөр шарек л гэсэн үг шүү дээ. Хүйтнийг даалгүй эвдрэх шарек гэж юу байх вэ дээ. Шинэ зүтгүүр авснаас хойш ямар нэгэн байдлаар доголдол гараагүй хэвийн ажиллаж байгаа.

-Шинээр хоёр зүтгүүр авсан гэсэн, мөн “Трансмашхолдинг”-той байгуулсан гэрээний дагуу 35 эсвэл 42 ширхэг зүтгүүр авах ёстой гэсэн зөрүүтэй тоонууд байна л даа. Хэдэн зүтгүүр авахаар гэрээ байгуулсан юм бэ?

-Хоёр ширхэг зүтгүүр авсан гэж бичсэн байна лээ, тэр бол худлаа. Парк шинэчлэлтийн ажлын эхний туршилтад 2ТЭ11УМ маркийн нэг зүтгүүр авчирсан. Цаашид нэмж авчрах тухай яриа байдаг ч цаасан дээр буусан гэрээ хэлцэл одоогоор алга. Яригдах төдий л байна.

-УБТЗ-д нийлүүлсэн энэ зүтгүүрийг үйлдвэрлэсэн компаниас Монголд мэргэжилтнүүд ирж ажиллаж байгаа гэсэн. Тэд ямар ажлаар энд байгаа вэ, эвдэрсэн дизелийг засахаар ирсэн гэх мэдээлэл бий?

-Үйлдвэрээс засварчид ирсэн юм биш шүү дээ. Тухайн техникийг хэрхэн ажиллуулахыг монгол ажилчдад зааж сургахаар мэргэжилтэн ирсэн.

-Зүтгүүр аль үйлдвэрийнх вэ?

-Украины “Луганск”-т үйлдвэрлэсэн.

-Цаашид хэчнээн зүтгүүр оруулж ирэх вэ?

-Хамгийн сүүлд авсан 2ТЭ11УМ маркийн зүтгүүр орчин үеийн электрон, компьютержсэн үнэхээр хүчин чадал сайтай. Цаашид ийм зүтгүүрийг орж ирвэл үнэхээр сайн байна. Өнөөдөр Улаанбаатар төмөр замын зүтгүүрүүд 25-30 жил болж хуучирсан. Нийтдээ  71 зүтгүүр байгаа ч ашиглалтад байгаа нь 48-52 орчим байна. Нэг нь эвдрэхэд нөгөөгийнх нь сэлбэгийг авч сэлбэсээр урд хормойгоо авч хойд хормойгоо нөхнө гэгчээр л явж байна шүү дээ. Адаглаад л манай ашиглаж буй хуучин зүтгүүрүүдийн сэлбэг хэрэгсэл нь олдохгүй болж, заримыг нь бид өөрсдөө ч хийх нь бий.

2ТЭ11УМ маркийн зүтгүүр нь 4500 тонн ачааг татах хүчтэй юм байна. Харин хуучин зүтгүүрүүд 2600-2800 тонн ачаа татах хүчтэй ажээ. Юутай ч шинэ зүтгүүр эвдрээгүй ажлаа гүйцэтгэж байгаа тухай Зүтгүүрийн депогийн дарга мэдэгдлээ. Харин ажилчид нь хоёр зүтгүүр ирсэн, нэг нь ердийн ажиллаж байгаа бол хоёр дахь нь яасныг хэлж мэдэхгүй байв.