Үндэсний тээвэрлэгч МИАТ компани энэ сарын 29-нөөс буюу өнөөдрөөс эхлэн 2010 оны зуны цагийн хуваарьт шилжлээ. Энэхүү хуваарийн дагуу хавар, намрын сарууд болон зуны оргил ачааллын онцлогийг харгалзан долоо хоног бүр Бээжингийн чиглэлд 7-10 удаа, Сөүлийн чиглэлд 6-11 удаа, Токиогийн чиглэлд 2-4 удаа, Москва, Берлиний чиглэлд долоо хоногт хоёр удаа нисэх юм. Москва, Берлиний чиглэлийн хоёр дахь нислэг  дөрөвдүгээр сарын 29-нөөс эхэлнэ. Энэ зуны хуваарьт тусгаснаар Японы Осака хотын чиглэлд долоо, наймдугаар сард хуваарьт нислэг үйлдэх юм байна. 

2010 онд МИАТ компани ОХУ-ын “Аэрофлот”, БНСУ-ын “Кореан Эйр” компанитай аяллын код хамтран эзэмших гэрээ байгуулан ажиллаж байгаа бөгөөд энэхүү гэрээг “Кореан Эйр”-тэй байгуулснаар МИАТ компани зорчигчдодоо зарим өдөрт хоёр удаа, долоо хоногт 12 удаагийн аяллаар зорчих өргөн бололцоо бүрдүүлжээ. Ингэснээр АНУ, Зүүн Өмнөд Ази руу нисч буй зорчигчид “Кореан Эйр”-ийн билетээрээ Улаанбаатараас Сөүл рүү МИАТ-ын аяллаар зорчин өдрийн цагаар бууж, “Инчеон” нисэх буудалд олон цаг хүлээлгүйгээр Сөүлээс АНУ, Зүүн Өмнөд Азийн хот руу “Кореан Эйр”-ийн аяллаар дамжин нисэх  бололцоотой болж байгаа юм. Түүнчлэн МИАТ компани энэ зун зорчигчдынхоо эрэлт хэрэгцээнд нийцүүлэн Азийн хэд хэдэн чиглэлд захиалгат нислэг үйлдэхээр төлөвлөсөн байна.

Х.Сүрэн