Улаанбаатар хотод хэв  журам тогтоож,  иргэдийн аюулгүй тайван байдлыг та бид л хангах ёстой биз дээ гэж хотын дарга Г.Мөнхбаяр өнгөрсөн баасан гаригт дүүргүүдийн цагдаагийн газрын дарга нартай уулзах үеэрээ онцоллоо. Тэрбээр нийслэл хотод  нийтийг хавтайргасан архидалт,  охид эмэгтэйчүүдийн дунд бие үнэлэлт, ирээдүй болсон хүүхэд багачууд мансуурах бодист автсан байгааг цагдаагийн удирдлагуудад хэлж байна.  Та бүхэн эдгээр сэтгэл түгшээм асуудлыг мэдэж л байж таарна. Одоо хэрхэх вэ? Бид төрөөс цалинг нь аваад сууж байгаа улсууд.  Хариуцсан ажлаа хийцгээе. Алийн болгон харсан ч хараагүй юм шиг,  үзсэн ч үзээгүй юм шиг нүдэн балай чихэн дүлий явах вэ гэв. Энэ жилийн хувьд цаг хэтрүүлэн үүр цүүр хүртэл ажилладаг баар цэнгээнийн газруудыг хааж үзсэн. Тэр хирээр хэл ам дагуулсан ч гэлээ иргэдийн зүгээс талархал хүлээсэн архидалттай тэмцэх энэ ажил эргээд  унтаа  байдалд орсныг дуулгав.

Цаг хэтрүүлэн ажиллаж байгаад эрхээ хаалгасан  61 баарнаас 32 нь эрхээ сэргээлгэжээ.  Гэвч  сурсан юмыг сураар боож болдоггүй гэдэгчлэн тус газрууд шөнө 12 цагаас хойш иргэдэд архи согтууруулах ундаагаар үйлчилсээр буйг цагдаагийнхан учирлав.  Ундааны саванд ус, шар айрагны стаканд цай нэрээр пиво зарж  байгаа тэдгээр газрын эрхийг бүрмөсөн хаах санал энэ үеэр гарлаа. Өөрөөр хэлбэл дахин хатуухан тэмцэл өрнүүлэх тухай хөндөгдсөн гэсэн үг. Ингэхгүй бол архидалтыг дагаад гэмт хэрэг гарч, иргэд тайван бус орчинд амьдарч байна гэлээ. Хотын зүгээс цагдаагийн байгуулагадаа санхүүгийн дорвитой дэмжлэг үзүүлэхээр чармайж байна. Гахай явган, нохой нүцгэн шахуу гүйж явдаг цагдаа нараа унаажуулж байна.  Цаашид ч анхаарах болно. Энэ бүхний хариуд  та бүхэн иргэдийн тайван, амгалан амьдралын төлөө ажлаа хийсэн шиг хийх хэрэгтэй гэж анхаарууллаа.  Гол нь иргэдийн нэхэл хатуутай асуултуудаас бултах ямар ч арга зам байхгүй.   Дүүргүүдийн удирдлагуудтайгаа уулзаж харьяа нутаг дэвсгэр дээрээ архидалт, биеэ үнэлэлт, мансууруулах бодис гэсэн энэ 3 аюулыг алга болгох учиртайг санууллаа.  Хотын даргын хэлсэн эдгээр үг ямар ч хэтрүүлэггүй бодит үнэн гэдгийг цагдаа нар ч хүлээн зөвшөөрч, өгсөн үүргийн дагуу ажиллах болно гэлээ.