Хөдөлмөр хамгаалал, дүрэмт хувцас үйлдвэрлэгч, захиалагчдын улсын анхдугаар уулзалт зөвлөгөөн маргааш “SS” клубт болно. Монгол Улсын Засгийн газраас үндэсний үйлдвэрлэлийг дэмжих, ажлын байрыг нэмэгдүүлэх зорилтын хүрээнд хөдөлмөр хамгаалал, дүрэмт хувцасны үйлдвэрлэл эрхлэгчдийг дэмжих, үйлдвэрлэл, хэрэглэгчдийн хамтын ажиллагааг ойртуулах ажлын хүрээнд энэ уулзалт зөвлөгөөнийг зохион байгуулж байна. Уг зөвлөгөөнийг Хүнс, хөдөө аж ахуй, хөнгөн үйлдвэрийн яам, Нийгмийн хамгаалал, хөдөлмөрийн яам, Монголын ажил олгогч эздийн холбоо, Монголын захиалга, хувцас үйлдвэрлэгчдийн холбоо, Монголын мэргэжлийн холбоодын нэгдсэн зөвлөл хамтран зохион байгуулж байгаа бөгөөд зөвлөгөөний үеэр:

-ХХААХҮ-ийн Дэд сайд Х.Золжаргал, “Үйлдвэрлэлийг дэмжих, бодлогын хэрэгжилт, цаашдын зорилт” сэдвээр,

-Ажил олгогч эздийн холбооны гүйцэтгэх захирал Х.Ганбаатар “Төр, хувийн хэвшлийн түншлэл” сэдвээр,

-“Зорбиом ХХК” –ын захирал М.Батзориг “Оёдлын үйлдвэрүүдийн өнөөгийн байдал, зах зээлийн харилцаанд” сэдвээр,

-ШУТИС-ийн Хувцас судлалын төвийн захирал, доктор Ч.Алтанцэцэг “Оёдлын үйлдвэрлэлд хувцас судлалын төвийн үүрэг”, “Тусгай зориулалтын хувцасны стандартын шаардлага ба тулгамдсан асуудлууд” сэдвүүдээр,

-МАОЭНХолбооны зөвлөх, инженер Л.Өлзийбуян “Ажлын байрны эрсдлийн менежмент” сэдвээр тус тус илтгэл тавих ажээ. Үйл ажиллагааны төгсгөлд шилмэл загварын үзүүлбэртэй ба хувийн хэвшлийн үйлдвэрлэгч компаниуд үзэсгэлэн гаргах аж.

Т.Бадрах