Оросын автомашин үйлдвэрлэгч “Маруся Моторс” компани “Формула нэг”-ийн Virgin Racing компанийн дийлэнх хувьцааг эзэмших болсноор тус баг ирэх улирлаас эхлэн авто уралдааны хаан ангилалд “Marussia Virgin Racing” нэрээр уралдах болж байна. Энэ улиралд “Формула нэг”-т хөл тавьсан рүүки баг цаашид Ричард Брэнсонтой хамтын ажиллагаагаа үргэлжлүүлэх юм. Британийн бизнесмэн Сэр Ричард Брэнсон 2009 онд Manor Motorsport-той гурван жилийн хугацаатай спонсорын гэрээ байгуулж, багийг өөрийн нэрээр нэрлэх эрхтэй болсон юм.

Virgin Racing баг цаашид ОХУ-ын компанитай хамтран ажиллах болсноор ирэх улирлын уралдааны төмөр хөлгөө Москва хотноо танилцуулах болно.

Сүүлийн үед ОХУ “Формула нэг”-т ихээхэн анхаарал хандуулах болсон билээ. 2014 оноос эхлэн Хар тэнгисийн эрэг дээрх Сочи хотод “Формула нэг”-ийн гран-при уралдааныг зохион байгуулах гэрээг өнгөрсөн сард үзэглэсэн бөгөөд энэ спортод хөл тавьсан анхны орос нисгэгч Виталий Петров өдгөө “Renault” багийн бүрэлдэхүүнд уралдаж байгаа билээ.