Аравдугаар сарын гурав дахь арав хоногт Архангай аймгийн Чулуут сумын төвд хөгжлийн чуулга болов. Уг уулзалт зөвлөгөөнийг Цэцэрлэг хот дахь Чулуут сумын нутгийн зөвлөл, аймаг, сумдын Засаг даргын тамгын газрууд хамтран зохион байгуулж, орон нутгийнхаа хөгжлийн өнөөгийн байдал, цаашдын чиглэлийг хэлэлцэв. Чуулга уулзалтанд сум орон нутгаас хүн амын бүх давхрагыг төлөөлөн 100 хүн, аймгийн газар, хэлтсийн удирдлага, мэргэжилтнүүд оролцлоо. Энэ үеэр сүү, цагаан идээг үйлдвэрлэлийн аргаар боловсруулж, төрлийг олшруулан, орчин үеийн чанарын өндөр шаардлагад нийцүүлэн зах зээлд нийлүүлэх, Халуун усны рашааныг түшиглэн амралт-сувилал, жуулчны бааз байгуулан тохижуулах, Урд Хойд мөрөнгийн нуур, Чулуут голын Битүү хясааны загасыг үзүүлэх хотхон байгуулах, Шивээ ширээт хүрээний буйрт музей байгуулах, Донгойн даваанаас тус сумын төвийг хатуу хучилттай замаар холбох зэрэг бүтээлч ажлуудыг хийх талаар харилцан санал бодлоо солилцон, төлөвлөгөө гаргажээ.