Адуун сүргээс унтаж хоцорсон бяцхан унага, алсаас сүүмэлзэх манан дунд,
сүүмэлзэн зэрэглээтэн айсаж ирэх шиг хайр хүний сэтгэлийн манан дунд
эрхлэн нялхран бас уяраан догдлууланхан ирдэг. Үгээр илэрхийлэхийн
аргагүй нэг л бүлээн, гэгээлэг, баяр баясгалан, гэгээн алсад тэмүүлэх
мөрөөдлийн совинг хайр бас авч ирдэг. Хайрлан дурласан хүнд бүрхэг
манантай өдөр ч, жавар тачигнасан хахир шөнө ч бүлээн дулаахан,
гэрэлтэй, өнгөлөгөөр мэдрэгддэг. Хайр гэрэлтсэн нүдэнд, өвлийн цасан
дороос ув улаахан сарнай цэцэг цомирлогоо дэлгэж, аагим халуун өдөр ч
гоёмсог цасан ширхэг гялалзан гялтганан агаарт бүжиглэнхэн харагднам.