МАХН-ын XXYI их хурлын үйл ажиллагаа түр завсарлаад байна. Үдээс өмнө МАХН-ын дарга, ерөнхий нарийн бичгийн дарга, нарийн бичгийн дарга нарын илтгэлийг сонссон юм. УИХ-ын гишүүн С.Баяр мөрийн хөтөлбөрийн шинэчлэлтийн талаар илтгэсэн бол УИХ дахь МАХН-ын бүлгийн дарга Д.Лүндээжанцан намын дүрэмд оруулах өөрчлөлтүүдийн талаар ярилаа. Илтгэлүүдэд МАН бол МАХН-ын зүй ёсны эхлэл бөгөөд үргэлжлэл болохыг онцолж байв. МАХН-ын дүрэмд “МАН бол МАХН-ын зүй ёсны эхлэл бөгөөд үргэлжлэл. Нийгмийн ардчилсан үзэл баримтлал бүхий хуулийн этгээд” гэж оруулахаар болжээ.

Алтан соёмбыг намынхаа далбаанд нэмэгдэл бэлгэдэл болгож улаан сарнайтай хослуулан оруулахаар болсон байна. Мөн намынхаа далбааг улаан, цагаан, хөх өнгө хослуулан шинэчлэхээр дүрмийн төсөлд тусгажээ. Намын төв хэвлэл “Үнэн” сониныг “Монголын үнэн” гэж нэрлэх санал орууллаа. Намын шийдвэрийн эсрэг ажилласан, намаас нэр дэвшигчидтэй зэрэгцэн бие дааж сонгуульд нэрээ дэвшүүлсэн МАХН-ын гишүүдэд намаас гаргах хэмээх хамгийн хатуу шийтгэл оногдуулж байхаар дүрмийн төсөлд тусгасныг Д.Лүндээжанцан дарга илтгэлдээ танилцууллаа. Үдээс хойш эдгээр асуудлыг их хурлын төлөөлөгчид хэлэлцэж эхлэх юм. Мөн Хяналтын ерөнхий хорооны илтгэлийг сонсоно. Одоо төлөөлөгчид Чингис хааны хөшөөнд цэцэг өргөж, дурсгалын гэрэл зураг татуулж байна.

Д.ОЮУН