Монгол Улсын Ерөнхийлөгч Ц.Элбэгдорж Төрийн өндөр албан тушаалтнуудын цалинг 30 хувь хүртэл нэмэгдүүлэх тухай УИХ-ын тогтоолын төсөлд өнгөрсөн долоо хоногийн баасан гаригт хэсэгчилсэн хориг тавьсан билээ. Энэ асуудлыг УИХ-ын Төрийн байгуулалтын байн­гын хорооны өчигдрийн хуралдаанаар авч хэлэлцсэн ч олонхийн саналаар “Хүлээж авах боломжгүй” гэж үзлээ.

Ерөнхийлөгч УИХ-ын тогтоолд хориг тавьсан үндэслэлээ их, дээд сургуульд суралцаж байгаа оюутны сургалтын тэтгэлгийг УИХ-аар хэ­лэлцэн шийдвэрлээгүй цагт төрийн тэргүүний цалинг нэмэгдүүлэх нь учир дутагдалтай хэмээн үзсэн байсан юм.  Хоригийг Ерөнхийлөгчийн Тамгын газрын дарга Д.Баттулга Байнгын хорооны хуралдаанд танилцуулсан. Мөн оюутнуудад сургалтын тэтгэлэг олгоход хэдий хэмжээний хөрөнгө төсөвт суулгах шаардлагатай, хэдэн оюутан хамруулахаар төсөл боловс­руулсан тухай ч гишүүдэд тайлбар өглөө. Ерөнхийлөгчийн санаачлан бо­ловсруулсан энэхүү хуулийн төсөлд магадлан итгэмжлэгдсэн их, дээд сургуулийн 120 мянган оюутныг хам­руулахаар заажээ. Сард нэг оюутанд 58 мянган төгрөгийн тэтгэлэг олго­но. Үүнд нийт 115 тэрбум төгрөг зарцуулагдах аж.

Байнгын хорооны гишүүдийн хувьд энэхүү оюутанд олгох тэт­гэлгийн асуудлаас илүүтэй, Ерөн­хийлөгчийн хоригт шүүмж­лэл­тэй хандлаа. УИХ-ын гишүүн С.Батболдын хэлснээр бол Ерөн­хий­лөгч жижиг улстөр хийж буй юм байх. Түүний хувьд Монголын төрд хүчин зүтгэж байгаагийн хувьд цалин­гийнхаа нэмэгдлийг авах хү­сэлтэй. Эхнэр хүүхдээ тэжээхэд нэмэр болно. Ер нь ч төрд зүтгэж байгаа хүмүүсээс гадна эмч, багш гээд төрийн албанд харьяалагддаг хүн бүхэн цалингаа нэмүүлэх сонир­холтой. Нөгөө талаасаа оюутнуудад тэтгэлэг олгохдоо асуудлыг бас наа­натай, цаанатай авч үзэх. Улсын хэмжээнд 160 орчим их, дээд сур­гууль, коллежид 160 мянга орчим оюутан суралцдаг. Тэднээс хэд нь жин­хэнэ сурч мэдэхийн төлөө явж байгаа вэ гэдгийг хэмжүүр болгох. Амьдралын боломж тааруу хэрнээ сурлага сайтай, суралцах идэвх сонирхолтой оюутанд л тэтгэлэг олгодог бол гэхээс биш, зүгээр нэг дээд боловсролын диплом өвөртлөх сонирхолтой хэсгийг төр ингэж сар тутамд 58 мянган төгрөгөөр “угжих” нь утгагүй. Засгийн газрын зүгээс ч дээд боловсролын сургалтын чанарыг сайжруулах зорилгоор тодорхой хөтөлбөр боловсруулаад явж буй. Тэр бүгдтэй энэхүү Ерөнхийлөгчийн өргөн барьсан төсөл уялдах учиртай. Жүжгийн тайзан дээр тоглосоор залхлаа” гэв.

Харин УИХ-ын гишүүн Д.Энх­бат “Засгийн газраас цалин нэ­мээд байдаг, иргэд нь ядуураад л байдаг. Ерөнхийлөгчийн хувьд эвгүй байдалд ороод арга буюу ийм шийдвэр гаргасан болов уу. Ард­чилсан намын бүлэг цалингаасаа татгалзсан. МАХН-ын бүлэг ч бас татгалзах биз. Эцсийн дүндээ УИХ-ын гишүүн З.Алтай, С.Оюун бид гурав л цалингийнхаа нэмэгдлээс татгалзаагүй болж, хэрэгт унах нь л дээ. Энэ чинь юуг харуулаад байна вэ гэхээр нийгэм, эдийн засгийн бодлого буруу болохыг нотлоод байна. Алийн болгон ингэж биенээ хуурах юм бэ, болъё л доо” гэв.

Байнгын хорооны хуралдааны эхэнд УИХ-ын гишүүн Х.Тэмүүжин, Г.Баярсайхан нар орж ирсэн ч, эл асуудлыг хэлэлцэх болуут гарч явсан юм. Ингэснээр өмнөх өд­рийнхөө бүлгийн хуралдаанаас гар­гасан “Ардчилсан намын бүлэг Ерөнхийлөгчийн хоригийг хүлээж авсан” гэх байр суурийг нээлттэй үл­дээсэн бололтой.

Байнгын хорооны хуралдаанд 11 гишүүн оролцож, 100 хувийн сана­лаар “Ерөнхийлөгчийн хоригийг хүлээж авах боломгүй” гэж үзлээ.