Үйлдвэр худалдааны яамны төрийн нарийн бичгийн дарга асан Д.Сүрэнхорын албан тушаалаа урвуулан ашиглаж  улсад 91.3 сая төгрөгийн хохирол учруулсан хэрэгт нь  Сүхбаатар дүүргийн анхан шатны шүүхээс  дөрвөн  жилийн хорих ял оноосон юм. Харин  өнгөрсөн долоо хоногт нийслэлийн Шүүхэд давж заалдах шатны шүүх болж  түүнд  анхан шатны шүүхээс оноосон ялыг хэвээр баталсан. Эл шүүх хуралтай зэрэгцэн түүний энхэр Д.Эрдэнэ-Отгон энэ сарын 16-ны өдөр авто осол гаргаж 30 настай эрэгтэйн амь насыг хохироосон харамсалтай хэрэг гарсан билээ. Одоогоор түүнийг цагдан хориогүй бөгөөд Замын цагдаагийн газрын Эрүүгийн тасагт шалгаж байгаа юм.  Харин Д.Сүрэнхорын биеийн байдал хүндэвтэр байгаа тухай эх сурвалжийн мэдээлэл байна.  Эхнэр  нь авто осол гаргасан нь түүнд сэтгэлзүйн хувьд хүнд цохилт болсон бололтой. Яллагдагч  Д.Сүрэнхорын  өмгөөлөгч Ч.Алтанцолтоос түүний биеийн байдлын талаар тодрууллаа.

-Д.Сүрэнхорын эрүүл мэндийн байдал муудаж эмнэлэгт хэвтсэн гэсэн. Энэ талаар тодруулахгүй юу?

-Тийм ээ,  цагдан хоригдсон өдрөөс эхлэн  эрүүл мэндийн байдал нь тааруу байсан. Энэ талаар  анхан шатны шүүх хурлын үеэр  шүүх бүрэлдэхүүнд дуулгаж нарийн мэргэжлийн эмчид үзүүлэх хэрэгтэй учраас батлан даалтад гаргах хүсэлт тавьсан, гэвч   цагдан хорихоос түр хугацаагаар чөлөөлөөгүй. Одоогоор биеийн байдал нь хүндэвтэр байна. Өнгөрөгч долоо хоногт эргэлтээр очиход хорих ангийн эмнэлэгт хэвтсэн  байна лээ.

-Одоогоор  ямар оноштой эмчлүүж байна вэ?

-Өвчний  оношийг нарийн мэргэжлийн эмч нар хэлнэ.  Миний сонссоноор Д.Сүрэнхорын ходоодны салст бүрхэвч шархалсан, бөөр хоёрдугаар зэргийн унжилттай, элэгний С вирустэй, элэг томорч хатуурсан гэсэн оноштой.

-Эрүүл мэндийн  сайдын баталсан  “Ялтан ял эдлэх боломжгүй өвчний жагсаалт”  гэж бий.  Тэгэхээр  Д.Сүрэнхорд эмч нарын тавьсан онош дээрх өвчний жагсаалтад бий юу?

-Эрүүл мэндийн сайдын баталсан ялтны ял эдлэх боломжгүй   өвчний тухай жагсаалт бий.  Гэхдээ Д.Сүрэнхорын  эрүүл мэндийн байдлыг нарийн мэргэжлийн эмч нар тогтооно.  Түүнээс биш өвчиллөө гээд ялаас чөлөөлөгдөх эрхзүйн үндэслэл  байхгүй. Хэрэв эрүүл мэндийн байдал нь улам хүндэрэхэд хүрвэл сайдын баталсан  журмын дагуу мэргэжлийн эмч нарын баг нарийн үзлэг шинжилгээ хийнэ. Үнэхээр эрүүл мэндийн байдлаар тэнцэхгүй ял эдлэх боломжгүй онош тогтоогдвол суллуулах тухай ярих байх.

-Эхнэр нь автын осол гаргасныг Д.Сүрэнхор сонссон болов уу, сэтгэлзүйн хувьд хүнд байгаа гэсэн?

-Тэр талаар надад мэдэх зүйл алга байна даа.