Улстөрд хачирхалтай бас сонирхолтой томилгоонууд үргэлжилсээр байх янзтай, Монгол Улсын Ерөнхийлөгчийн хуулийн бодлогын зөвлөхөөр ажиллаж байсан Г.Ганзориг Улсын ерөнхий прокурорын туслах, газрын даргаар томилогдож, өнөөдрөөс ажилдаа оржээ. Улсын ерөнхий прокурор нь шинээр газар байгуулж, түүнийхээ даргаар Г.Ганзоригийг томилсон байна. Харин Ерөнхийлөгчийн зүгээс одоогоор Г.Ганзориг зөвлөхийг албан тушаалаас нь чөлөөллөө гэсэн албан мэдээг хараахан хийгээгүй байгаа юм.

Улстөрийн халуун тогоонд өрнөж буй энэхүү хачирхалтай томилгоонуудыг улстөрийн хүрээнийхэний зарим нь “Дэвшүүлэн зайлуулсан томилгоо” гэж дүгнэж буй бол “Ямар юмных нь дэвшүүлэх байх вэ, тушаалыг нь буурууллаа” гэж үзэх хүн ч  байна.

Шинэ албанд томилогдоод байгаа Г.Ганзориг даргын боловсролын тухай цухас дурдвал, ЗХУ-ын Краснадор хотын Кубаны их сургууль, Вашингтон хот дахь Америкийн Их сургуулийг хуульч мэргэжлээр тус бүр дүүргэжээ.

Ажил мэргэжлийн тухайд хоёр жил шахамын хугацаанд Ерөнхийлөгчийн хуулийн бодлогын зөвлөхөөр ажилласан бол түүнээс өмнө Дорноговь аймгийн шүүхэд улсын арбитрч, шүүгч, Зүүн баян дахь Ардын армийн тусгай шүүхийн шүүгч, Улсын дээд шүүхийн Цэргийн коллегид шүүгч, Эрүүгийн танхимын шүүгч зэрэг ажлуудыг хийж байсан аж.

Мөн Монголын шүүхийн байгууллагуудыг шинэчлэх, шүүгчдийг давтан сургах чиглэлээр АНУ-ын Техас мужийн хуулийн фирмтэй холбоо тогтоон хэдэн жил дараалан монголын Дээд шүүх болон орон нутгийн шүүгчдийг америкт авчран сургалтанд хамруулах ажлыг зохион байгуулж байжээ.
 

Г.Дарь