Цагдаагийн дарга нарын олон улсын чуулган АНУ-ын Флорида мужийн Орландо хотноо  болж байна. Тус чуулганд манай улсаас Цагдаагийн ерөнхий газрын дарга, хошууч генерал Д.Сандаг-Очир  оролцоод ирлээ. Ерөнхий Ассамблейн чуулганд АНУ-ын дэд ерөнхийлөгч, ерөнхий прокурор, Хууль зүйн яам, Дотоод хэргийн яамны төрийн нарийн бичгийн дарга, Холбооны мөрдөх товчооны дарга зэрэг албаны хүмүүс оролцсон байна. Чуулганаар улс орон, ард иргэдийн аюулгүй байдал, амар амгалан амьдралыг хангахад цагдаа, хууль хяналтын байгууллагууд, мөн иргэний болон бизнесийн байгууллагуудын ажлын уялдаа холбоо, түншлэл чухал болохыг цохон  тэмдэглэжээ. 

Цагдаа, хууль хяналтын байгууллагуудаас явуулж буй үйл ажиллагааны хувь заяа, үр дүн нь нутаг дэвсгэрийн цагдаагийн алба, гудамжинд эргүүл хийж буй цагдаагийн алба хаагчийн ажил үүрэгтээ хандах хандлага, ёс зүй, шударга байдалтай шууд холбоотой. Тиймээс санхүүгийн бэрхшээлтэй тулгарч буй өнөө үед бүхий л анхаарлаа байгууллагын нүд чих болсон цагдаагийн алба хаагчийн мэргэжлийн ур чадвар, мэдлэгийг дээшлүүлэх, орчин үеийн техник хэрэгслээр хангахад хандуулахыг чухалчилж байгаа аж. Гэмт хэрэгтэй тэмцэж ард иргэдийн аюулгүй байдлыг хангаж буй цагдаагийн алба хаагчийн өөрийнх нь аюулгүй байдал мөн анхаарлын төвд байгааг бас онцолсон байна.