Үндэсний Аюулгүй Байдлын Зөвлөлөөс халдварт өвчний тархалт
нэмэгдэж байгаа болон, газар хөдлөлтийн гамшигт үзэгдлийн талаар сэтгүүлчдэд
мэдээлэл хийсэн. Сүүлийн жилүүдэд Монгол Улсад шинээр болон дахин сэргэж байгаа халдварт өвчнүүдийн
тохиолдол ихээр нэмэгдэж байгаа. Тухайлбал томуугийн A хүрээний (H1N1)
шинэ вирусын халдвар 2009 оны аравдугаар сарын 12-нд анх бүртгэгдэж,
2010 оны хоёрдугаар сарын 8-ны байдлаар улсын хэмжээнд лабораториор батлагдсан
1367 тохиолдол гарсан нь түгшүүр төрүүлэх хэмжээнд
хүрээд байгаа. Харин цагаан
сарын дараагаас залгуулаад 2010 оны улирлын томуу эрс нэмэгдсэн.  Үүний
зэрэгцээ газар хөдлөл судлалын
мэргэжилтнүүд 2010-2012 онд Монгол Улс газар хөдлөлтийн идэвхтэй үе байна гэдгийг
шинжлэх ухааны үндэстэйгээр гаргаж тавиад байгаа. Ялангуяа нийслэл хот газар хөдлөлтийн
эрсдэлтэй бүсэд хамаарч
байгаа тул түүнээс урьдчилан сэргийлэх, аврах, сэргээн босгох өнөөгийн чадавхи,
боломжид үнэлгээ хийлгэхээр ҮАБЗ–өөс Засгийн
газарт чиглэл өгч Шадар сайдаар ахлуулсан “Газар хөдлөлтийн
гамшгаас хамгаалах нэгдсэн төлөвлөгөө”-г шинэчлэн боловсруулах үүрэг бүхий ажлын
хэсэг байгуулсан.

Уг ажлын хэсгээс
ирэх даваа гаригт “Газар хөдлөлтийн төлөв байдал, болзошгүй аюул, авах арга хэмжээ” сэдэвт нээлттэй
сонсгол хийх юм байна. Тус
сонсголд Шадар сайд М.Энхболд болон УИХ-ын Аюулгүй
байдал гадаад бодлогын байнгын хорооны дарга З.Энхболд, Барилга хот
байгуулалтын сайд, Онцгой байдлын ерөнхий газрын дарга, хотын удирдлагууд оролцох
юм байна. Нээлттэй сонсгол Төрийн
ордон дахь “Иргэний танхимд” 11.00 цагаас
болох аж.

Б.ГАЛ